Lo Golf de Gasconha (en basco Bizkaiko golkoa o Kantauri Itsasoa; en espanhòu golfo de Vizcaya o mar Cantábrico; en francés golfe de Gascogne; en anglés Bay of Biscay) qu’ei un golf gran de l'Ocean Atlantic situat a l'oèst d'Euròpa. En anant dempuish lo nòrd de Galícia dinc au sud de Bretanha, que confronta las còstas de Galícia, d’Espanha, deu Bascoat, d'Occitània, de França e de Bretanha. E en tèrmes d'estats, que confronta Espanha e França.

Existishen autas concepcions, frequentas en espanhòu, qui conceben lo Golf de Gasconha segon duas visions contradictòrias.

• A còps lo tèrme espanhòu "Mar Cantabrica” (mar Cantábrico) que cobrish tot lo Golf de Gasconha mentre que lo tèrme “Golf de Biscaia” (golfo de Vizcaya) e’s limita a la partida orientala de la mar.
• D’autes còps, lo tèrme espanhòu “Golf de Biscaia” (golfo de Vizcaya) que cobrish tot lo Golf de Gasconha mentre que lo tèrme "Mar Cantabrica” (mar Cantábrico) e’s limita a la partida meridionala de la mar qui ei près de la Peninsula Iberica.

Lo litorau qu'ei l'airau de l'abitat de hèra ausèths, que la majoritat non s'i reprodusishen pas mes qu’i son tròp coneguts e las lors vesitas i son pro frequentas. A maugrat de la hòrta pression cinegetica, hèra d'anatidèus limicòlas e autes ausèths marins que son cada an obligats de crotzar lo golf, que s’i pausan e que's noirishen dens las suas còstas, los sons estuaris e las suas paluns gaireben desaparegudas.