Lo debanament de la batalha es mau conegut. Pasmens, sembla que l'armada crestiana foguèsse sospresa per l'arribada de renfòrç otomans fòrça importants que donèron un avantatge numeric decisiu ai Turcs. Blocats, lei Crestians s'installèron sus una posicion defensiva onte causèron de pèrdas grèvas ais Otomans. Pasmens, la carga mancada de Ladislau III Jagellon còntra la gàrdia de Murad II causèt la mòrt dau rèi e entraïnèt la dislocacion de l'armada crestiana. János Hunyadi capitèt de quitar lo prat batalhier mai perdiguèt unei milièrs d'òmes en causa dau secutament menat per lei tropas otomanas. Lei pèrdas foguèron importantas dins lei dos camps : entre 11 000 e 15 000 mòrts per lei coalizats crestians e entre 20 000 e 28 000 mòrts per leis Otomans.