Torgeir Bjørn (fødd 9. mars 1964) er ein norsk tidlegare langrennslaupar og seinare sportskommentator, fødd i Alvdal.^[1] Han vart norsk meister i 3 x 10 km stafett med Bjerke IL i 1989 og 1990, samt med Nannestad SK i 1993. Individuelt vart han ikkje betre enn nummer 4 i noregsmeisterskap, noko han vart fem gonngar. Faren, Kristian Bjørn, var og ein merittert skilaupar med mellom anna bronse på 4x10 km stafett i VM på ski i 1950 i Lake Placid.

Torgeir Bjørn vart norsk juniormeister på 15 km i 1983 – saman med syskjenbarnet Jan Erik Bjørn vart det dobbeltsiger. Torgeir Bjørn var på landslaget i fleire år og gjekk inn til ellevteplass på 50 km fristil i OL i Calgary i 1988. I sin beste sesong, 1990-sesongen, kom han på 16. plass i verdscupen i langrenn.

• Ski-NM 1986: Nr 4 på 15 km på Vang
• Ski-NM 1987: Nr 12 på 30 km i Steinkjer
• Ski-NM 1988: Nr 6 på 15 km på Vang
• Ski-NM 1989: Nr 4 på 15 km og på 50 km på Geilo. Stafett-gull med Bjerke IL
• Ski-NM 1990: Nr 4 på 15 km på Gjøvik. Stafett-gull med Bjerke IL
• Ski-NM 1991: Nr 4 på 30 km i Misvær
• Ski-NM 1992: Stafett-bronse med Nannestad SK i Molde
• Ski-NM 1993: Stafett-gull med Nannestad SK på Dombås

Frå midten av 1990-talet har Bjørn vore sportskommentator for NRK både på TV og i radio.^[2] I hovudsak kommenterer han langrenn, men også skiskyting.

Etter 10 års samarbeid med trenaren Roger Grubben, innleidde skiskyttaren Ole Einar Bjørndalen i 2010 eit samarbeid med Torgeir Bjørn som hovudtrenar.^[3]