The Mix er eit remixalbum av Kraftwerk frå 1991. Det inneheld nyinnspelte versjonar av eit utval av songane deira som opphavleg vart gjevne ut på albuma frå Autobahn til Electric Café. Hütter sa i intervju at han rekna The Mix som eit slags konsertalbum, sidan det fanga resultat av stadige digitale improvisasjonar frå bandet i studioet deira Kling Klang. Bandet tok til scenen igjen i 1990, etter ein ni år lang pause frå turnélivet. Dei fleste av songane i setlista deira hadde vorte kraftig omarrangert og likna songane på dette albumet.
Bandet har forklart at dei ikkje ønskte å gje ut eit vanleg samlealbum. Samstundes var dei i ferd med å byggje om studioet sitt frå analogt til ditigtalt, der dei lagra dei originale lydbanda på datamaskinar. Sidan bandet ikkje hadde spelt inn nye songar før dei skulle ut på turné, så ønskte ikkje Ralf Hütter at Kraftwerk skulle høyrast utdatert ut.
Albumet fekk blanda kritikk då det kom ut. Mange var skuffa over at dei ikkje hadde skrive nye songar, og produksjonen av dei nyinnspelte songane var heller ikkje særleg nyskapande, noko Kraftwerk tidlegare hadde vore kjend for. The Mix vart skapt fullstendig digitalt, men på ei tid då teknologien for dette enno ikkje var heilt ferdigutvikla, så lyttarane fann mange av songane noko sterile samanlikna med dei analoge elektroniske instrumenta dei nytta på dei tidlegare versjonane.
