Kiruna gamle rådhus, kjent som Kiruna stadshus eller Igloo, var ein bygning sentralt i Kiruna som var sete for administrasjonen i Kiruna kommun i Norrbottens län i Sverige fram til 2018. Det vart rive i 2019, i samband med flyttinga av sentrum i Kiruna.

Rådhuset vart teikna av arkitekten Artur von Schmalensee og vart bygt i åra 1959-62. Bygningen var 49 x 49 meter lang og brei, og 45 meter høg. Klokketårnet på taket på 26 meter vart eit kjent landemerke for Kiruna. Det vart teikna av Bror Marklund og innvigt i 1963.^[1]

Rådhuset vart kalla «Igloo» av Artur von Schmalensee på grunn av den låge inngangen til ein stor open hall med høge lysinnsleppingar. I 1964 fekk bygningen og arkitekten Kasper Salin-prisen for «Sveriges vackraste offentliga byggnad». Rådhuset husa også ein kunsthall.

Frå 2009 vart det lagt planar om å rive rådhuset, då aktiviteten til gruveselskapet LKAB hadde underminert grunntilhøva til sentrale Kiruna. I oktober 2012 vart det lyst ut ei arkitekttevling om å teikna eit nytt rådhus. I september 2013 var vinnaren utropt som Henning Larsen Architects A/S med forslaget «Kristallen».^[2][3]

I august 2017 vart klokketårnet på det gamle rådhuset teke ned og flytta til den nye bygningen.^[1][4] Bygningen vart riven våren 2019.^[5][6]

• 
  Rådhuset om vinteren
• 
  Inngang
• 
  Tårnet
• 
  Måleri i rådhuset av Axel Törneman.
• 
  Skulptur av Christian Eriksson.