Ënner Positiounswénkel versteet den Astronom eng Richtungsangab am Equatoriale Koordinatesystem (Rektaszensioun an Deklinatioun), déi sech op d'Richtung zum Himmels-Nordpol bezitt.

De Positiounswénkel vun engem Objet 2, bezunn op den Objet 1, ass dee Wénkel, deen tëscht der Verbindungslinn déi vum Objet 1 op den Objet 2 fortgeet, an där déi vum Objet 2 op den Himmelsnordpol weist. E gëtt vun Nord iwwer Ost (also géint den Auerzäresënn) a vun 0° bis 360° gezielt.

Déi genannt Verbindungslinne sinn ëmmer Grousskrees-Ofschnëtter vun der Himmelskugel. Betruecht een dat duerch Objet 1, Objet 2 an den Himmelsnordpol gezeechent sphärescht Dräieck, sou léisst sech mat Hëllef vu Formele aus der sphärescher Trigonometrie eng Formel fir den an Objet 1 uleienden Dräieckswénkel ofleeden.

Hunnn d'Objeten 1 an 2 déi equatorial Koordinaten α₁, δ₁ resp. α₂, δ₂, sou kann de Positiounswénkel vum Objet 1 zum Objet 2 berechent ginn duerch^[1]

${\displaystyle P=\arctan \left({\frac {\sin(\alpha _{1}-\alpha _{2})}{\cos(\delta _{2})\tan(\delta _{1})-\sin(\delta _{2})\cos(\alpha _{1}-\alpha _{2})}}\right)}$

Am Fall, wou béid Rektaszensioune gläich sinn, ass de Positiounswénkel 0. Wann den Nenner vum Broch negativ ass, muss e bei d'Resultat 180° addéiert ginn, fir de Wénkel an de korrekte Beräich tëscht 90° an 270° ze bréngen.

De Positiounswénkel hëlleft bei der Beschreiwung vun der relativer Lag vun zwéin Objeten oder vu Beweegungsrichtungen um Stärenhimmel a gëtt virun allem fir follgend Date gebraucht:

• géigesäiteg Lag vun Himmelskierper, z. B. vun Duebelstären oder Nopeschgalaxien
• Beweegungsrichtung vu Koméiten, Asteroiden a Meteoren
• Richtung vun der Eegebeweegung vu Stären.
• Plaz bei enke Konjunktioune (schäinbaart Treffen) vu Stären
• Orientéierung vu Bunnachse, wéi bei Duebelstären an Exoplanéiten
• Orientéierung vun de Rotatiounsachse vu Planéite

• Déi béid hënnescht „Këschtestäre“ vum grousse Won, Stärebild Ursa Major weise bekanntlech op de Polarstär. Den ieweschte „Këschtestär“, alpha UMa, huet d'Koordinaten α₁ = 165,93° an δ₁ = 61,75°. Den ëneschte Këschtestär, beta UMa, huet d'Koordinaten α₂ = 165,46° an δ₂ = 56.38°. De Positiounswénkel vum alpha am Rapport zum beta UMa huet dofir 2,4°; d'Verbindungslinn weist wéi erwaart bal genee no Norden a weist nëmme ganz wéineg no Osten. Ëmgekéiert steet beta am Rapport zum alpha UMa op engem Positiounswénkel vun 182,8°.
• All Fixstäre beweege sech am Zuch vun der deeglecher visueller Ëmdréiung vun der Himmelskugel genee a Richtung vun engem Positiounswénkel vun 270°.
• De Stär Algieba ass en Duebelstär. Säi Begleeder steet zurzäit an engem Ofstand vu 4,4Bousekonne vum Haaptstär an op engem Positiounswénkel vun 125 Grad.

• Himmelskoordinaten
• Koordinatesystem
• Richtungsmiessung

Portal Astronomie

1. ↑ J. Meeus: Astronomical Algorithms. 2nd ed., Willmann-Bell, Richmond 1998, ISBN 0-943396-61-1, Kap. 17