De geographeschen Zentrum vu Lëtzebuerg läit am Nordweste vu Pëtten, am Naturschutzgebitt Pëttenerbësch an der Gemeng Miersch.

Op der Plaz gouf 2011 eng Maark vun der Naturverwaltung, an Zesummenaarbecht mam Kadaster opgeriicht.

Si besteet aus véier dräieckege Placken aus Stol, déi an déi véier Himmelsrichtunge weisen. Op der Plack déi no Süde weist ass deen heiten Text ausgestanzt: Centre géographique 49° 46’ 38’’ N 06° 05’ 43’’ O

Um Fouss vun der Maark steet d'Joreszuel 2011.

D'Maark gouf am Juni 2011 offiziell virgestallt, zesumme mam Naturreservat Pëttenerbësch an engem Léierpad.^[1]

De geographeschen Zentrum gouf 2009 vun de Spezialiste vun der Kadasterverwaltung berechent. Basis dofir waren d'Grenze vum Land, sou wéi se 1815 um Wiener Kongress mat Preisen (haut Däitschland), 1839 duerch de Vertrag vu London (spezifiéiert am Joer 1843) mat der Belsch an am 20. Joerhonnert duerch den Austausch vu klenge Parzelle mat Frankräich festgeluecht goufen.^[2]

Fir déi topographesch Rechnunge gouf de World Geodetic System 1984 (WGS 84) gebraucht. Um Terrain gouf déi genee Plaz vum Zentrum vum Land mat enger Genauegkeet vun engem Zentimeter festgeluecht, dat mat der Hëllef vun den US-amerikanesche GPS- a russesche GLONASS-Satelliten.^[2]

• Schmit, R., 2011. Im Naturreservat "Pëttemerbësch" (SIC). Pettingen im Mittelpunkt. Geografisches Zentrum des Landes liegt in Pettingen bei Mersch / Neuer Naturlehrpfad vorgestellt. Luxemburger Wort vum 28. Juni 2011, S. 17. [1]

• Nationalmonument vun der Onofhängegkeet um Krounebierg zu Miersch
• Op Kneiff, Lieu-dit an der Gemeng Ëlwen, mat deem héchste Punkt zu Lëtzebuerg

De geographeschen Zentrum vum Land

• Um Geoportail.lu
• Op der Websäit vum Kadaster vu Lëtzebuerg

1. ↑ Luxemburger Wort vum 28. Juni 2011, S. 17.
2. ↑ ^{2,0 2,1} http://www.act.public.lu/fr/actualites/2011/06/centre-geographique/index.html Websäit vum Kadaster