მარგარიტა დე ფუა(ბასკ. Margarita Foixkoa; ფრანგ. Marguerite de Foix; დ. 1449 — გ. 15 მაისი, 1486) — ფუას დინასტიის წარმომადგენელი. ნავარის დედოფალ ელეანორ I-ის ასული. ბრეტანის ჰერცოგინია 1474-86 წლებში როგორც ფრანსუა II-ის მეორე ცოლი. საფრანგეთის დედოფალ ანა ბრეტონელის დედა.
ბიოგრაფია
მარგარიტა დაიბადა 1449 წელს. იგი იყო ნავარის დედოფალ ელეანორ I-ისა და გრაფ გასტონ IV-ის ასული.
1474 წლის 27 ივნისს, შატო დე კლიზონში იგი ცოლად გაჰყვა ბრეტანის დაქვრივებულ ჰერცოგ ფრანსუა II-ს, რომელიც იყო ეტამპის გრაფ რიჩარდ მონფორისა და მარგარიტა ორლეანელის ვაჟი. ფრანსუასათვის ეს მეორე ქორწინება იყო, ვინაიდან მისი პირველი ცოლი, მარგარიტა ბრეტონელი ისე გარდაიცვალა, რომ მემკვიდრე ვერ დაუტოვა.
ფრანსუასა და მარგარიტას მხოლოდ ორი გოგონა შეეძინათ, რომელთაგან უფროსი ბრეტანის ჰერცოგინია ხდება მამის გარდაცვალების შემდეგ. მარგარიტა გარდაიცვალა 1486 წლის 15 მაისს ნანტში. იგი დაკრძალეს ნანტის აკლდამაში, ქმრის გვერდით, რომელმაც ფრანგული რენესანსის სტილში საოცარი "ფრანსუა II-ის აკლდამა" ააგო.
შვილები
- ანა (1477-1514), ბრეტანის ჰერცოგინია, პირველად ცოლად გაჰყვა ავსტრიის ერცჰერცოგ მაქსიმილიან I-ს, რომელსაც მალევე გასცილდა და ცოლად საფრანგეთის მეფე შარლ VIII-ს გაჰყვა, რომლის დაღუპვის შემდეგაც იქორწინა შარლის ბიძაშვილზე, საფრანგეთის მეფე ლუი XII-ზე, რომელთანაც ორი გოგონა შეეძინა;
- იზაბელი (1478-1490), დანიშნული იყო ჟან დ'ალბრეზე, თუმცა ქორწინებამდე გარდაიცვალა.
ლიტერატურა
- Booton, Diane E. (2010). Manuscripts, Market and the Transition to Print in Late Medieval Brittany. Ashgate Publishing.
- Woodacre, Elena (2013). The Queens Regnant of Navarre: Succession, Politics, and Partnership, 1274-1512. Palgrave Macmillan.
