დაბაწვრილის ციხე — ციხესიმაგრე თანამედროვე თურქეთის ტერიტორიაზე. მდებარეობს სოფელ მეშელის ტერიტორიაზე, პატარა გორაკზე. თავისი მდებარეობიდან გამომდინარე ციხე შავშეთიდან სამცხე-აჭარისკენ მიმავალ გზებს აკონტროლებდა.

ტოპონიმ „დაბაწვრილში“ მსაზღვრელია გეოგრაფიული ობიექტის სახელი „დაბა“.

XIX-XX საუკუნეების მკვლევართა მიერ დაბაწვრილის ციხე თითქმის არ იყო შესწავლილი. 2007 წელს თ. ხუციშვილმა შეისწავლა ძეგლი და იგი მოკლედ აღწერა.^[1] ციხესიმაგრე ადგილზე შეისწავლეს შოთა რუსთაველის ეროვნული სამეცნიერო ფონდის მიერ დაფინანსებული პროექტის - „თურქეთში მდებარე ქართული ისტორიული მხარეების ტაო-კლარჯეთისა და კოლა-არტაანის ქართული მატერიალური კულტურის ძეგლების კატალოგის“ სამუშაო ჯგუფის წევრებმა. ექსპედიციის ანგარიშში ციხე ნახსენებია, როგორც „კოპაძეების ციხე“.ამასთანავე აღნიშნულია, რომ „ნაგებობიდან ამოწვდილია ერთი ვიწრო, მაღალი კედელი, მომცრო, მონაცრისფრო კვადრებით მოპირკეთებული“.^[2]

დაბაწვრილის ციხე პატარა გორაკზეა აღმართული. ეს იყო ადგილობრივი შავშელი აზნაურის ადგილსამყოფელი. დღემდე შემონახულია სამხრეთ გალავნის ერთი ფრაგმენტი, ასევე რამდენიმე ნაგებობის ნაშთი და სამხრეთ-აღმოსავლეთი გალავნის საძირკველი. ციხე ჩრდილო-დასავლეთიდან სამხრეთ-აღმოსავლეთისკენ იყო განვრცობილი. სამხრეთ ნაწილში აღმართულია თითქმის 7 მეტრიანი გალავნის ნაწილი, რომელიც გარედან თლილი, დამუშავებული პატარა კვადრებითაა მოპირკეთებული. გალავანი გორაკის თავზე კოშკის ფორმის ნაგებობით გვირგვინდებოდა.

• ტაო-კლარჯეთის ციხე-სიმაგრეები ტ. 2, თბ., 2020 ISBN 978-9941-9738-1-9