Jonas Neubauer eftir fyrsta heimsmeistaramótið í NES Tetris
Jonas Neubauer (19. apríl 1981 – 5. janúar 2021) var Bandarískur Tetris spilari og sjöfaldur heimsmeistari í NES Tetris.[1][2][3]
Æviágrip
Jonas Neubauer kynntist Tetris þegar hann fór að spila leikinn í Macintosh tölvu frænda síns þegar hann var 6 eða 7 ára gamall. Hann byrjaði að spila NES útgáfu leiksins 9 ára gamall.[4] Í nóvember 2006 birti Neubauer fyrstu upptökuna svo vitað sé til af svokölluðu „maxout“, því þegar stigamælir leiksins fyllist (999.999 stig)[5], og svo í september 2008 birti hann fyrstu upptökuna af „maxout“ þar sem byrjað var á nítjánda erfiðleikastigi, því hæsta sem hægt er að hefja leik á.[6]
Árið 2010 keppti Neubauer í fyrsta heimsmeistaramótinu í NES Tetris (Classic Tetris World Championship) þar sem hann stóð uppi sem sigurvegari eftir sigur á Harry Hong í úrslitunum.[4] Hann sigraði mótið næstu þrjú árin áður en hann lenti í öðru sæti árið 2014 eftir tap gegn Harry Hong. Næstu þrjú árin, 2015-2017, hélt hann heimsmeistaratitlinum óslitið en var svo sigraður árið 2018 af hinum 16 ára Joseph Saelee.[7]
Í júní 2018 bætti hann heimsmetið fyrir flestu stig í einum leik af NES Tetris þegar hann náði 1.245.200 stigum (nota þarf utanaðkomandi hugbúnað svo leikurinn geti sýnt meira en 999.999 stig).[8]
5. janúar 2021 var Jonas Neubauer bráðkvaddur á heimili sínu aðeins 39 ára að aldri.[9]
