PROFILPELAJAR.COM

Joaquín Rodrigo Vidre, 1ma Markezo de la Gardeni di Aranjuez

Profesiono:	muzikisto (pianisto) e kompozisto

Lando:	Hispania
Naskodato:	22 di novembro 1901
Nasko-loko:	Sagunto, provinco di Valencia, Hispania
Mortodato:	6 di julio 1999
Morto-loko:	Madrid, Hispania
Retoloko:	http://www.joaquin-rodrigo.com/

Joaquín Rodrigo naskis en 22 di novembro 1901 en Sagunto, qua jacas en la provinco di Valencia, Hispania. Il esis filiulo di komercisto e la maxim yuna de dek filii. Ilu blindeskis pro difterio evante quar yari. Ca desfortuneso duktis ilu a muziko.

En 1906 la familio translojis a Valencia-urbo, en qua yuna Joaquín atendis skolo por le blinda. Ibe ilu unesme lernis pri muziko e precipue muziko di Rigoletto da Giuseppe Verdi afektis profunde. Inter 1917 e 1922 ilu lernis kompozado che Francisco Antich en Valenciala konservatorio. Maxim frua kompozajo da Rodrigo esas de la yaro 1922 ma unesma verko, Juglares, esis recitata en 1924. Dum ca yari ilu konoceskis kun avantgardismo di kompozisti en Madrid. En 1925 Rodrigo ne sucesis ganar Nacionala Muziko-premio e il translojis a Paris por studiar che Dukas.

Joaquín Rodrigo mariajis kun Turkiana pianisto Victoria Kamhi en 1933. La verko Cántino de la esposa esas dedikata a lua spozino. La maxim famoza verko da Rodrigo, Concierto de Aranjuez, recitesis da gitaristo Sainz de la Maza pos la interna milito Hispaniala. Sequanta verki esis Concierto heroico por piano (1943), Concierto de estío por violino (1944), Ausencias de Dulcinea por baso, quar soprani ed orkestro (1948), Concerto in modo galante por violoncelo (1949).

Dum la regno da Francisco Franco, Joaquín Rodrigo esis konocata persono anke exter Hispania. Granda evento esis en San Francisco en 1958 la prima recito di Fantasía para un gentilhombre, qua esis dedikita a gitaristo Andrés Segovia, ilqua esis anke la soloisto en la prima recito. Dum la 1950-yari il kompozis anke baleto Pavana real e *zarzuelo El hijo fingido.

Rodrigo recevis rango di honorumala profesoro en Salamanca universitato en 1964 pro lua verki. Rodrigo divenis min produktiva dum sequanta yari, kande nova generaciono di Hispaniana kompozisti aparis. En 1966 ilu kompozis Concierto Madrigal por gitaro-duo. Tre importanta taski ilu recevis exter Hispania, exemple sinfoniala poemo Ala busca del más allá por Houston Symphony (1976) pro la celebro di 300-yara existo di Usa. En 1978 flutisto James Galway komendis verko Concierto pastoral por lua instrumento. Maxim lasta verko da Rodrigo esis Concierto para una fiesta en 1982. Segun gitaristo Pepe Romero, ica verko esas teknikale maxim desfacila plear.