Concorde esis pasajero-aviono qua aviacis plu rapide kam sono.

Esis du prototipi, e konstruktado di amba komencis en februaro 1965: la Franca, 001, esis konstruktata en Toulouse ed unesmfoye aviacis ye 2 di marto 1969; la Britana, 002, esis konstruktata en Bristol ed unesmafoye aviacis ye 9 di aprilo 1969. Ye 1 di oktobro 1969, Concorde 001 unesmafoye aviacis plu rapide kam sono, dum olua 45ma aviacis, pilotita da aviono-probisto Jean Pinet. Dum la 102ma aviaco ol atingis duopla de la rapideso di sono, quon ol mantenis dum 53 minuti.

Dum la sequanta yari l'aviono vizitis plura landi por reklamar olua qualesi ed atraktar kompranti. Ye 26 di septembro 1973, Concorde unesmafoye aviaco sen-pauze trans la Atlantiko. La voyajo, de Washington DC a Paris, duris 3 hori e 32 minuti.

Ol unesmafoye aviaci reguloze ye la 21ma di januaro 1976, de London a Bahrain e de Paris a Rio de Janeiro.

Reguloz aviaci komencis a John F. Kennedy-aeroportuo, ye New York, ye 22 di novembro 1977. Aviaci di Concorde super Usa esis komence interdiktata pro la granda sono efektigata; ca interdikto esis pose revokata por Dulles-aeroportuo ye Washington DC, e plu tarde por JFK-aeroportuo.

Concorde oficale retretis ye 24 di oktobro 2003. Retreto dil avioni esis anuncata ye 10 di aprilo 2003. Kauzi esis diminutata pasajero-nombri pos la mortiva acidento di 25 di julio 2000 en Francia, minmulta voyaji per aero pos la 9-11-ataki, e plu granda manteno-kusti. Franca Concorde facis ultim aviaco ye 27 di junio, e nun restas ye la Musée de l'Air proxim Paris. Britana Concorde, pos semano di adiala aviaci en Britania, arivis ye Heathrow-aeroportuo ye 23 di oktobro pos lasta komercal aviaco.

La last aviaco di irga Concorde eventis ye 26 di novembro 2003 en Anglia, de l'aeroportuo di Heathrow a Bristol.