Cartagena de Indias esas urbo en Kolumbia. Segun statistiki dil yaro 2018, ol havis 1 036 412 habitanti. Lua tota surfaco esas 609,1 km². Jacanta an la litoro di Karibia, ol fondesis ye la 1ma di junio 1533 da Pedro de Heredia. Nun ol esas importanta turistala e kulturala urbo.
Geografio
Fulmino proxim Cartagena.
La reliefo di Cartagena de Indias esas plana an la litoro, kun monti sude del urbo. Lua mezavalora altitudo esas 2 metri super la marala nivelo.
Lua klimato esas mi-arida varma (Bsh segun la klimatala klasifikuro da Köppen). La mezavalora temperaturi ne varias multe dum la tota yaro, iranta de 26,7°C en januaro til 28,5°C en junio. La maxima temperaturi povas atingar 40°C dum kelka monati, kontre ke la minima rare esas infre 19°C. Rare dum la historio dil urbo ol frapesis da uragani. La lasta uragani qui frapis ol esis Joan, en 1988, e Mathew, en 2016.
La mezavalora yarala pluvo-quanto dil urbo esas 1087 mm, e la maxim pluvoza monato esas oktobro, kun mezavalore 238,8 mm. La sika sezono iras de fino di decembro til la komenco di aprilo. De januaro til marto pluvas min kam 2 mm.
