Leland B. Yeager (4 de octobre 1924 - 23 de april 2018[1]) era un economista e interlinguista statounitese.
Leland B. Yeager nasceva le 4 de octobre 1924 in Oak Park, Illinois, SUA. Ille recipeva su A.B. (graduante Phi Beta Kappa) ab Oberlin College in 1948, su M.A. ab le Universitate Columbia in 1949, e su Ph.D. ab le mesme institution in 1952. Durante le 2-nde Guerra Mundial ille traduceva codices japonese pro le armea american. Ille ha desde alora inseniate a plure universitates, includente le Universitate de Virginia, ubi ille – usque ille ante alcun annos se retirava – esseva actualmente Paul Goodloe McIntire Professor de Economia Emerite, e al Universitate Auburn, ubi ille ha tenite le titulo de Professor Distinguite Ludwig con Mises de Economia desde 1985.
In le estate de 1999 Leland B. Yeager se retirava ab su posto durante sex annos como presidente del Union Mundial pro Interlingua que ille semper ha supportate con zelo. Usque alora ille esseva un del duo representantes american in le consilio del UMI que fixa le grande lineas strategic del labor pro diffunder interlingua. Desde le fin de april 1984 ille esseva inter le directores del american Interlingua Institute, cuje presidente ille esseva ab 1989 a 1993.
Leland B. Yeager comprava un parve libro super esperanto, quando ille esseva studente in le schola superior de Scarsdale, vicin a New York. Isto fundava su interesse de linguas. Desde le prime dies de interlingua in 1951, Leland B. Yeager ha essite active collaborator. Ille ha pronunciate numerose discursos professional super interlingua, e durante le conferentias international de interlingua – ma regrettabilemente non in Romania 1999, ubi le longe distantia e le guerra in Kosovo le impediva venir a su grande dissatisfaction – ille ha semper monstrate le participantes, como interlingua pote esser usate como un instrumento de communicar themas non tractante interlingua. Specialmente economia e themas lingual chinese-japonese ha essite sur su agenda, e le salas ha ascoltate con grande attention.
Su discursos professional e ben preparate ha introducite themas difficile como economia e linguistica japonese-chinese a multissime ascoltatores in un maniera capturante e attractive, e plures de su discursos ha essite postea editate in interlingua.
In 1991, ille editava con Ingvar Stenström, Svedia, le libro multo laudate "Tema: Interlinguistica e Interlingua – discursos public" (ISBN 90-71196-17-8). Un parte de iste discursos se origina ab su presidentia del Interlingua Institute, quando ille como presidente pronunciava un serie de discursos super interlingua in foros national e international.
Durante tosto 50 annos Leland B. Yeager ha publicate un centena de libros, traductiones, essayos technic, monographias, recensiones etc. in varie linguas. Ille ha tenite conferentias e cursos in octo universitates american e ha essite membro e consiliero de un dozena de societates professional. Ille es internationalmente estimate como commentator economic.
In 1997, Liberty Fund publicava le libro spisse de 442 paginas, "The Fluttering Veil – Essays on Monetary Disequilibrium", super le theorias e obras de Leland B. Yeager. Le libro esseva le principal super le copertura de un recente catalogo ab Liberty Fund.
Malgrado su pensionamento, Leland B. Yeager non se ha retirate de su labor pro interlingua que continua con fortia non-diminuite. Le ration pro abandonar le posto como presidente del Union Mundial pro Interlingua esseva dar spatio pro fortias plus juvene. E, probabilemente, pro haber plus de tempore pro interlingua...
Bibliographia
Ligamines externe
Yeager mystique: The polymath as teacher, scholar and colleague
|
|---|
| | | | Obras basic | |
|---|
| | Pioneros | |
|---|
| | Characteristicas | |
|---|
| | Organisationes ligate | |
|---|
| | Periodicos in interlingua | |
|---|
|
