Un home de Vilameán é unha novela histórica de Xoán Bernárdez Vilar, publicada en 1976. Trata sobre a orixe e evolución da Revolta irmandiña.
Historia e características
O protagonista é Pedro Bas, veciño de Vilameán (Tomiño), que farto da deplorable situación na que se atopaba o campesiñado por mor dos impostos do clero e os abusos da nobreza, decide integrarse na Santa Irmandade.
O libro distribúese en catro capítulos, Ceifa, Sementeira, Colleita e Holocausto, e conta, ademais da bibliografía e un mapa coas poboacións onde se desenvolve a historia, cun anexo onde se recollen as principais reivindicacións sociais da Historia dende o Código civil de Urnammum (2064 a.C) ata o preito Tabera - Fonseca, do cal se recollen varias testemuñas de persoas que viviran a Revolta irmandiña.
Edicións
En 1975 gañou o Premio Alfredo Somoza, convocado polo Patronato da Cultura Galega de Montevideo. O libro foi publicado ao ano seguinte, co subtítulo de Anatomía dunha revolución.
Dende 1983 pertence ao fondo bibliográfico de Edicións Xerais, e dende 1990 está na súa colección Narrativa, co subtítulo de Anatomía da revolución irmandiña. A edición inclúe unha táboa histórica, bibliografía consultada e dous mapas, un das Rías Baixas e outro de Galicia.
Véxase tamén
Outros artigos
Ligazóns externas
