Leonardo Alonso Bao, nado en Vigo o 28 de decembro de 1914 e finado o 8 de abril de 1986, foi un futbolista galego. Xogaba na demarcación de centrocampista.
Traxectoria
Comezou a xogar no Ford, o equipo do seu barrio e tivo unha extensa traxectoria polos equipos da cidade de Vigo, primeiro o Club Berbés e despois o Unión Sporting Club e tras a guerra civil, como a maior parte dos xogadores deste pasou ao Fútbol Club Vigués.
O seu bo papel fixo que fichara polo Real Valladolid, que xogaba na Segunda División, tras o descenso do equipo valisoletano a Terceira División ficha polo Celta de Vigo na tempada 1943/44.
Foi un dos xogadores fundamentais do Celta deses anos, formando no mediocampo xunto a Gabriel Alonso e Miguel Muñoz, ata o ano 1947 cando deixa o fútbol en activo. Porén seguiu vinculado ao club, esta vez como conserxe.
