Jim Marurai, nado o 9 de xullo de 1947 en Ivirua na illa de Mangaia e finado na mesma localidade en novembro de 2020,[1] foi un político das Illas Cook, primeiro ministro desde o 14 de decembro de 2004 ata o 30 de novembro de 2010.
Traxectoria
Marurai licenciouse na Universidade de Otango en Dunedin (Nova Zelandia), foi elixido deputado por primeira vez en 1994 polo Partido da Alianza, posteriormente ingresou no Partido Democrático e foi ministro de educación e máis tarde primeiro ministro, pero en 2005 logo de desputas internas deixou o seu partido para formar o Partido Demo Tumu que gobernou en coalición co Partido das Illas Cook ata que se rompeu o acordo de goberno e formou unha nova coalición cos demócratas, volvendo ao seo deste partido antes das eleccións de 2006, permanecendo despois como primeiro ministro sen ter o liderado do partido. O 23 de decembro de 2009, substituíu o viceprimeiro ministro e líder do PD Terepai Maoate en favor de Robert Wigmore, provocando a dimisión dos ministros demócratas[2][3], e a expulsión de Marurai do partido[4].
En xaneiro de 2010, ante o anuncio dunha moción de censura apoiada por unha maioría dos deputados do Parlamento, Marurai anunciou que non ía convocar o parlamento por algúns meses, xa que non había necesidade da súa xuntanza ata a votación dos orzamentos, prevista para o 1 de xullo, os dous principais partidos, o Demócrata e o das Illas Cook decidiron acudir ao Representante da Raíña para que convocase ao parlamento, o que a constitución non prevé, xa que o Representante só pode actuar co refrendo do primeiro ministro.[5]
O Partido Demócrata readmitiu a Marurai nunha conferencia celebrada en xuño de 2010.[6], non obstante anunciou que non continuaría como primeiro ministro aínda se o seu partido gañase as eleccións de 2010.[7], o que aconteceu revalidando Marurai o seu escano por Ivirua.[8]
Notas
Véxase tamén
Ligazóns externas
