Jagoba Arrasate Elustondo, nado en Berriatua (Biscaia) o 22 de abril de 1978, é un exfutbolista e actual adestrador de fútbol español. A súa posición era a de dianteiro e xogou en varios equipos vascos en Segunda B e Terceira División. Dende o ano 2015 adestra ó CD Numancia da LaLiga 1|2|3.
Traxectoria
Como futbolista
Arrasate xogaba como dianteiro. Formouse nas categorías inferiores da Real Sociedad de Fútbol, en cuxo equipo xuvenil chegou a xogar durante dúas tempadas, pero non chegou a dar o salto nin sequera ao filial da Real. Fichou en 1997 pola SD Eibar, en cuxo filial xogou durante as 4 tempadas seguintes, pero tampouco deu o salto ao primeiro equipo. A tempada 2000-01 xogou co Eibar B en Segunda División B tras lograr o ascenso dende Terceira.
En 2001 abandona o Eibar e ficha polo Lemona de Tercera División. Durante as campañas seguintes militou noutros clubs vascos de Terceira, como o Beasain ou o Elgoibar ata fichar en 2005 polo Portugalete, equipo acabado de ascender a Segunda B. Jagoba finalizaría a súa carreira como futbolista en 2007 tras militar unha última tempada na SD Amorebieta sen cumprir aínda os 30 anos de idade.[1]
Como adestrador
Apenas uns meses despois de colgar as botas como futbolista debutou como adestrador do equipo do seu pobo, o Berriatuko FT, ao que dirixiu durante a tempada 2007-08 en categoría Territorial Preferente de Biscaia.
As dúas tempadas seguintes (2008-10) fíxose cargo dun equipo de máis caché, concretamente do Elgoibar, que militaba en Elgoibar. Co Elgoibar realizou un gran papel, xa que o clasificou durante dúas tempadas consecutivas para xogar a promoción de ascenso a Segunda B. O Burgos CF en 2009 e o Marino de Luanco en 2010 evitaron o ascenso dos elgoibarreses.
O bo papel realizado por un equipo que non era a priori dos potentes da categoría, chamou a atención do fútbol guipuscoano sobre este adestrador, que foi fichado pola Real Sociedad como parte do seu staff técnico. Durante as dúas seguintes campañas (2010-11 e 2011-12) adestrou os equipos xuvenís da Real, o Easo e o de División de Honra. Finalmente, ao inicio da tempada 2012-13 incorporouse o primeiro equipo como terceiro adestrador deste, sendo axudante de Philippe Montanier.[2]
Foi polo tanto copartícipe da gran tempada que levou a cabo a Real Sociedad na campaña 2012-13, na que os pupilos de Montanier despregaron un xogo espléndido e lograron clasificarse para a rolda previa da Liga de Campións tras rematar en cuarto posto ao final da tempada. Tras anunciarse pouco antes de finalizar a campaña que Montanier non aceptaría a oferta de renovación da Real Sociedad e que tanto el coma o seu segundo, Michel Troin, ían fichar polo Stade Rennais, soaron numerosos nomes como posibles substitutos do francés á fronte da Real Sociedad. Entre os nomes barallados figuraba o de Arrasate, pouco coñecido pola opinión pública, pero ben valorado dentro do club.[3]
O 7 de xuño de 2013, o presidente da Real Sociedad Jokin Aperribay confirma que Arrasate será o novo adestrador do equipo durante a tempada 2013-14, tras descartarse a fichaxe do 'Tata' Martino, primeira opción barallada polo club.[4] O equipo superou con claridade a rolda previa da Liga de Campións eliminando ao Olympique Lyonnais por un global de 4-0. Non obstante, foi eliminado da competición na fase de grupos cun só punto en 6 partidos. Na liga, o equipo conseguiu a clasificación para a Europa League logo de quedar sétimo. Na Copa do Rei, os donostiarras accederon ás semifinais por primeira vez en 26 anos, sendo eliminados polo FC Barcelona.
O 2 de novembro de 2014 foi destituído debido aos malos resultados.[5] O seu substituto foi David Moyes.[6]
Notas
Véxase tamén
Ligazóns externas
.jpg)
