Fanny Hesse, nada como Angelina Fanny Eilshemius o 22 de xuño de 1850 na cidade de Nova York e finada o 1 de decembro de 1934, foi unha investigadora estadounidense, coñecida polo seu traballo en microbioloxía e no desenvolvemento do ágar como medio de cultivo de microorganismos.[1][2][3][4]
Traxectoria
Angelina Fanny Eilshemiusl era filla de Gottfried Eilshemius, un rico comerciante de importacións, e Ceclie Le. Ela coñeceu ao médico Walther Hesse, o seu futuro marido e compañeiro de investigación, en 1872, mentres estaba en Alemaña . Fixéronse mozos en 1873 e casaron en Xenebra en 1874.[5][6]
Antes do seu descubrimento, Fanny Eilshemius de Hesse fixo debuxos para as publicacións de Walter Hesse. Mentres traballaba para o seu marido como técnica no laboratorio do médico e microbiólogo alemán Robert Koch, Fanny Eilshemius de Hesse suxeriu que o agar podería ser preferible á xelatina para o cultivo de bacterias. Isto levou a Koch a utilizar agar para cultivar as bacterias que causan a tuberculose, o que supuxo un grande avance para a ciencia da súa época.[5]
Nun artigo sobre o bacilo do tubérculo publicado en 1882, Koch mencionou o uso de ágar en lugar de xelatina, pero non lles deu crédito a Fanny Eilshemius e Walther Hesse, nin comentou por que fixera o cambio. A idea de Fanny Eilshemius de Hesse nunca resultou en ningún beneficio económico para a familia.[5]
Notas
