A estación de Teruel é unha estación de tren de Adif situada na cidade de Teruel, en Aragón. Ten servizos de media Distancia operados por Renfe. Dispón tamén de instalacións loxísticas usadas polos trens de mercadorías.[1]
Situación ferroviaria
Está situada no punto quilométrico 132,2 da liña 610 de ancho ibérico da rede ferroviaria española que une Zaragoza con Sagunt por Teruel,[2] entre as estacións de Cella e de Puerto Escandón. A quilometraxe correspóndese co histórico trazado entre Calatayud e Valencia tomando a primeira como punto de partida. O tramo é de vía única e está sen electrificar.
Está situada ao oeste do centro urbano ao final do camiño da Estación. A pesar de transcorrer máis dun século desde a inauguración do recinto o edificio para viaxeiros segue conservando sen apenas modificacións relevantes o aspecto que mostraba outrora. É de planta rectangular e dúas alturas cun tellado de catro vertentes cubrindo a estrutura. O material predominante é o ladrillo visto. Todo o conxunto é dunha extrema sobriedade, con vans adintelados e sen elementos decorativos remarcables.
A estación ten dúas plataformas, unha lateral cuberta á que accede a vía 1 e unha central sen cubrir, aínda que si dispón dun refuxio, á que acceden as vías 3 e 5.[1] En paralelo ás mencionadas e sen plataforma está a vía 7 que dispón dunha derivación da que nacen as vías 11, 13, 15 e 17.[1] Pola súa banda as vías 2, 4, 6, 8 e 10 finalizan na proximidade do edificio principal sendo a vía 10 a máis afastada delas. As instalacións complétanse con almacéns, peiraos, dúas cocheiras e diversas construcións anexas.
Dispón de sala de espera, venda de billetes, aseos, puntos informativos e un aparcadoiro exterior.
