Dead Letter Office é unha colección de rarezas e caras b da banda estadounidense de rock alternativo R.E.M., publicado o 27 de abril de 1987 a través do selo I.R.S. Records. O álbum é esencialmente unha colección de moitas gravacións adicionais de R.E.M. feitas desde antes de Murmur ata Lifes Rich Pageant, que foron descartes ou lanzáronse como caras b dos seus sinxelos a nivel internacional. Moitas das cancións son versións de bandas que influenciaron a R.E.M., como tres temas de The Velvet Underground, e cancións de Aerosmith ("Toys in the Attic"), Roger Miller ("King of the Road"), e do grupo tamén de Athens Pylon ("Crazy").^[1]

O guitarrista Peter Buck escribiu notas irónicas e autocríticas (e, nun caso, desculpas) na notas para as cancións no libreto do álbum. Buck inicialmente tivo dúbidas sobre o seu lanzamento, dicindo que sentía como que a xente percibiría o álbum como da banda "que intenta sacar proveito, quizais vender algúns discos", xa que a data de lanzamento final era anterior á do último álbum de estudo da banda con I.R.S., Document, en apenas catro meses.^[2]

O álbum foi publicado inicialmente como unha colección de 15 cancións en vinilo e casete, pero cando apareceu a súa edición en CD engadíronse os cinco temas do EP Chronic Town de 1982. Este foi o único CD dispoñible de Chronic Town ata o lanzamento da caixa de The Originals.

Tódolos temas escritos e compostos por Bill Berry, Peter Buck, Mike Mills e Michael Stipe, agás onde se indique.