O Colexio Profesional de Xornalistas de Galicia é unha asociación que agrupa os periodistas de Galicia co propósito de mellorar as súas condicións laborais, garantir a súa independencia e liberdade de prensa, e evitar á sociedade as informacións tendenciosas e deformadas. Foi creado no ano 2000, e desde o 2016 o seu decano é Francisco González Sarria. Ten a súa sede en Santiago de Compostela.
Actividades
En decembro de 2008 aprobouse o código deontolóxico do xornalismo galego, co obxectivo de garantir o dereito da sociedade a recibir unha información plural, veraz e independente. Establece os puntos básicos para a ética da profesión, e propón a creación dun Consello da Comunicación de Galicia.
Na defensa das persoas colexiadas, a entidade presenta de oficio denuncias e recursos de amparo. Amais, realízanse cursos de formación, xornadas e foros. Emítense informes e publicacións e redáctanse comunicados puntuais. Participou como convidado en comisións parlamentarias, como a da reforma da CRTVG.
Historia
O Colexio Profesional intentou crearse a comezos da década de 1980, pero non se levou adiante pola discusión sobre se admitir no seu seo todos os profesionais en activo ou limitalo ás persoas licenciadas en Ciencias da Información e membros das Asociacións da Prensa xa existentes en Galicia. A iniciativa foi retomada en 1996, logo da creación da Facultade de Ciencias da Información de Santiago de Compostela da man das Asociacións da Prensa de Santiago de Compostela, A Coruña, Lugo e Vigo, Asociación de Licenciados e Doutores, a Asociación de Periodistas de Galicia, a Asociación de Periodistas da Coruña e a Asociación de Xornalistas de Vigo. En novembro de 1997 aprobouse a creación do Colexio, e constituíuse unha comisión xestora para levar a cabo os trámites necesarios. A creación do Colexio foi aprobada por unanimidade no Parlamento Galego o 24 de febreiro de 1999.
Aceptouse o ingreso de todos os profesionais en exercicio, sen importar a súa titulación, até o 30 de setembro de 1999, momento a partir do cal se esixiría o título correspondente. Nun principio presentáronse 1.300 solicitudes, e aceptáronse algo máis de 1.000. A Asociación da Prensa de Vigo decidiu abandonar o Colexio ao non estar conforme con este criterio.
A Comisión Xestora elaborou o proxecto de Estatutos e organizou a Asemblea Xeral na que se aprobaron e foi elixida a Xunta de Goberno, celebrada en Santiago de Compostela o 8 e 9 de abril de 2000. Os Estatutos foron publicados no Diario Oficial de Galicia o 17 de xullo de 2000.
Xunta de goberno
Xosé Manuel Pereiro, vicedecano.
A Xunta de Goberno está formada polo decanato, o vicedecanato, a secretaría, a tesoureiría e por 8 vogais.
Entre 2012 e 2016 a Xunta conformárona Xosé Manuel Pereiro (decano), Rosa Aneiros Díaz (vicedecana), Marcos Sanluis López (secretario), Darío Janeiro Pereira (tesoureiro), Marcos Mosquera Domínguez, Rita Alonso Pérez, Pilar Piñeiro Pérez, Francisco López Iglesias, Belén Regueira Leal, Mónica Ares Gómez, Xosé Manuel Rodríguez Durán e Francisco González Sarria (vogais).
