PROFILPELAJAR.COM

Buamáil Birmingham
	52° 29′ N, 1° 54′ O / 52.48°N,1.9°W
Cineál	buamáil teach tábhairne ; ionsaí sceimhlitheoireachta
Cuid de	na Trioblóidí
Dáta na bliana	21 Samhain 1974
Suíomh	Birmingham, England , Birmingham, England
Tír	an Ríocht Aontaithe
Rannpháirtí	Óglaigh Shealadacha na hÉireann
Sprioc	teach tábhairne
Líon básanna	21
Líon gortaithe	182

Pléascadh buamaí in dhá theach tábhairne in Birmingham, Sasana, ar 21 Samhain 1974.^[1] Maraíodh 21 duine sa Mulberry Bush agus sa Tavern in the Town, agus gortaíodh os cionn 200. Ba é an sladmharú ba mheasa sa Bhreatain san fichiú haois é cé is moite d’aimsir chogaidh.

Cé gur ciontaíodh san éagóir seisear a dtugtar an Birmingham 6 orthu, ní raibh aon duine a bhí freagrach ciontaithe. Níor rinneadh fiosrú ceart. Bhí fianaise ‘caillte’ nó caite amach, buama nár phléasc ar iarraidh agus dá bhrí sin an t-eolas ar fad a bheadh le cruinniú uaidh curtha amú. Bhí an t-ionchoisne teoranta, ainmníodh baill den IRA a bhí freagrach ach níor tharla tada dá bharr sin. B’in an chéad uair ag an IRA éinne a ainmniú maidir leis an eachtra, beag beann ar sheisear nach raibh aon bhaint acu leis a bheith ciontaithe.^[2]

Tá na páipéir stáit oifigiúla a bhaineann leis an ionsaí faoi ghlas go dtí 2059, 75 bliain ar fad.

Imeachtaí

Oíche Dhéardaoin a bhí ann, a bpá faighte an lá sin ag go leor oibrithe agus iad ag dul amach ag bualadh le cairde le haghaidh oíche spraoi. Bhí an dá theach tábhairne plódaithe nuair a phléasc na buamaí tamall tar éis a hocht a chlog. Bhí an tríú buama in ionad eile ach níor phléasc sé sin. Seachtar ban agus ceithre fhear déag a maraíodh, déagóirí ab ea seachtar agus bhí cúigear eile faoi bhun 25 bliain d’aois.^[2]

Maraíodh naonúir sa Tavern in the Town. Cailleadh ochtar sa phléasc sa Mulberry Bush agus maraíodh beirt a bhí ag siúl thar bráid.

Chinn coiste cróinéara níos déanaí gur foláireamh teileafóin a ndearnadh praiseach de ba chúis leis an moill a bhí ar na póilíní daoine a thabhairt amach as na tithe tábhairne.^[3]^[4] Ach chinn giúiré an choiste cróinéara freisin nach raibh aon locht ar na póilíní agus nach raibh aon eolas faighte acu faoi na buamaí roimh ré.^[5]

Fiosruithe

Ghabh na póilíní Michael Christopher Hayes i 1974; ceistíodh é agus gur scaoileadh saor é.

Ansin sa bhliain 1990, bhí Michael Hayes ar dhuine den bheirt a ainmníodh as na buamaí a leagan in Birmingham, ar chlár de chuid Granada TV.

Sa bhliain 2017, bhí leithscéal gafa ag Hayes, as an mbaint a bhí aige leis an ngrúpa ón IRA a d’eagraigh an bhuamáil Dúirt Hayes go raibh “comhfhreagracht” á glacadh aige as gníomhartha uilig an IRA i Sasana, buamáil Birmingham ina measc. D’adhmaigh sé go raibh sé ina bhall den IRA ar feadh breis agus 30 bliain in Éirinn agus i Sasana agus go raibh páirt aige i ngníomhartha na heagraíochta in Birmingham.

Mhaígh Hayes nach raibh sé i gceist ag an IRA daoine a mharú agus gur thug siad rabhadh leathuair a chloig do phóilíní Shasana faoi na buamaí, ach go raibh moill ocht nóiméad ar an IRA an rabhadh sin a eisiúint,^[4] rud ba chúis leis an léirscrios. D'admhaigh Hayes gur bhain sé féin an dochar as an tríú buama nuair a chuala an IRA faoin ár a rinneadh sa dá áit eile.^[6] úirt sé go raibh a choinsias glan agus nach aon dúnmharfóir é féin.^[7]

Éagóir

Ar 25 Samhain 1974 i bParlaimint Westminster, ritheadh an tAcht Coiscthe Sceimhlitheoireachta. Ag an am céanna, d'fhógair an tAire Briotanach, an 'Rúnaí Baile', Roy Jenkins, gur eagraíocht mhídhleathach a bhí san IRA Sealadach. Dúirt sé "The powers... are Draconian. In combination they are unprecedented in peacetime."^[8]

Bhain na péas úsáid as an tAcht Coiscthe Sceimhlitheoireachta chun daoine neamhchiontacha a chur i ngéibheann.

Chuir Michael Havers cás an ionchúisimh i láthair sa bhliain 1975. Ar 15 Lúnasa 1975 ciontaíodh san éagóir seisear, ar a dtugtar ‘Seisear Birmingham’, mar gheall ar an mbuamáil.

Féach freisin

Tagairtí

↑ Maitiú Ó Coimín (10 Iúil 2017). "Leithscéal gafa ag buamadóir de chuid an IRA faoi bhuamáil Birmingham" (ga-IE). Tuairisc.ie. Dáta rochtana: 2022-11-21.
↑ ^2.0 ^2.1 "Fiosrú poiblí neamhspleách dlite d’íobartaigh Birmingham" (ga-IE). Tuairisc.ie (2024-11-24). Dáta rochtana: 2024-11-24.
↑ Nuacht RTÉ (2019-04-05). "'Foláireamh lochtach ba chúis le maruithe i mBirmingham'" (as ga-IE).
↑ ^4.0 ^4.1 Michael Hayes sa bhliain 2017ː "It was only later on that we realised there was eight valuable minutes missed. We were going to give them a half-hour warning. "Out of that half hour, eight minutes elapsed - eight priceless minutes." He said that as he understood it one of the phone boxes used for the telephone warnings was broken and another one was being used.
↑ Nuacht RTÉ (2020-11-18). "Fear gafa i mBéal Feirste faoi bhuamálacha Birmingham" (as ga).
↑ Is ar Hagley Road in Birmingham a bhí an tríú buama sin fágtha.
↑ Nuacht RTÉ (2017-07-27). "Iar-bhall den IRA le ceistiú faoi bhuamáil Birmingham" (as ga).
↑ H.C. Debs. Vol. 882 col. 35 25 November 1974