It RGB-kleursysteem is in kleurkodearring, in manear om in kleur út te drukken mei help fan in kombinaasje fan 'e trije primêre kleuren Read-Grien-Blau, útgeande fan additive kleurminging. Hoefolle oft fan eltse primêre kleur nedich is om 'e just mingkleur te krijen, wurdt útdrukt yn in getal dat almeast út 8 bits bestiet en fariëarje kin fan 0 oant 255. Foar HTML-tapassings (ynternet) wurdt dêrfoar ornaris it heksadesimaal systeem brûkt, wêrby't de juste hoemannichte fan elts fan 'e trije primêre kleuren werjûn wurdt yn in sechstjintallich stelsel, fan 00 ^o/_m 99, en dêrnei fierder geand fan AA ^o/_m FF. Yn tapassings dêr't in hegere kwaliteit fereaske wurdt, kinne ek 12, 16 of noch mear bits per kleur brûkt wurde, wat in grutter ferskaat oan kleuren opsmyt. Kleurwearden rinne by 12 bits útinoar fan 0 ^o/_m 4095, en by 16 bits fan 0 ^o/_m 65535. RAW-bestannen fan digitale kamera's, bygelyks, befetsje meastal 12-bits kleurwearden.

Yn it RGB-systeem wurde kleuren troch additive kleurminging opboud út trije primêre kleuren, read, grien en blau; dêrfandinne de ôfkoarting RGB. De hoemannichte fan in primêre kleur dy't by in swarte ûndergrûn nedich is foar it krijen fan 'e frege mingkleur, leit tusken de heksadesimale wearden 00 (neat, 0) en FF (alles, dat yn it desimaal systeem werjûn wurde soe mei it sifer 255).

In beskate kleur wurdt yn it RGB-systeem útdrukt yn seissiferige koades, wêrby't de letters A ^o/_m F ek as sifers beskôge wurde. Mei 16 ferskillende sifers (0 ^o/_m 9 en A ^o/_m F) × 6 beskikbere plakken yn in kleurkoade kinne mei dit systeem 16⁶, oftewol 16.777.216 ferskillende kleuren kodearre wurde. De earste beide sifers fan 'e seissiferige kleurkoade jouwe oan hoefolle read oft der nedich is (FF0000 is bgl. suver read:     ). It twadde siferpear jout oan hoefolle grien oft ferlet fan is (00FF00 is suver grien:     ). En de lêste beide sifers jouwe oan hoefolle blau oft der nedich is (0000FF is suver blau:     ). Suver swart en suver wyt wurde oanjûn mei de koades 000000, resp. FFFFFF. De kombinaasjes 111111, 222222, 333333, ensfh. binne ferskillende tinten griis.

Der bestiet ek in ferkoarte notaasje, wêrby't per kleur mar ien heksadesimaal teken brûkt wurdt. De koade FFF is dan wyt, F00 read, 0F0 grien, 00F blau, 000 swart, ensfh. Mei dy ferkoarte notaasje kinne fansels folle minder ûnderskate kleuren werjûn wurde: 16³, oftewol 4.096.

Oars as by ferve en inket is giel yn it RGB-kleursysteem, dat basearre is op ljocht mei additive kleurminging, gjin primêre kleur. Grien is dat krekt wol, wylst dat by ferve en inket wer gjin primêre kleur is (grien wurdt dêr ommers krigen troch blau en giel te mingen). Troch de kombinaasjes fan wikseljende yntinsiteit per kleur ûntsteane der by it RGB-systeem in hiel soad kleurmooglikheden.

It kleurberik fan it minsklik each kin op 'e rûge roai werjûn wurde mei it standertgromatisiteitsdiagram fan 'e CIE, dat op 'e yllustraasje rjochts werjûn is. It RGB-systeem, werjûn as in trijehoek, bestiet mar út in diel fan dat berik. De hoeken fan 'e trijehoek yn it diagram jouwe 'suver' read, grien en blau neffens it RGB-systeem wer. Alle mingsels fan dy kleuren falle binne de trijehoek, mar kleuren bûten de trijehoek kinne net werjûn wurde.

As men sa'n 'bûtenkleur' werjaan wol, wurdt dêrfoar binnen it RGB-systeem in kleur op 'e râne fan 'e trijehoek keazen dy't teminsten deselde tint hat. Dy oanpak jout in útkomst dy't altyd in legere fersêding as de orizjinele kleur hat; it resultaat is dus wat dof.

De 16.777.216 ferskillende kombinaasjes fan RGB-wearden sille yn 'e measte gefallen net resultearje yn 16.777.216 ferskillende kleurwerjeften op it kompjûterskerm. De sichtberens fan kleuren en kleurferskillen op in kompjûterskerm hingje nammentlik ôf fan 'e mooglikheden fan 'e fideokaart en it byldskerm.

De sortearre kleuretabel hjirûnder jout mear ynsjoch yn 'e relaasje tusken kleuren en it RGB-systeem.

• (in) RGB/CMYK convertor: set oer fan RGB nei CMYK en oarsom

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons  Ofbylden dy't by dit ûnderwerp hearre, binne te finen yn de kategory RGB fan Wikimedia Commons.