Ĝi funkcias kiel membrogazeto por Norvega Esperantista Ligo kaj direktas sin precipe al norvegaj esperantistoj. Celante la membrojn de NEL, la revuo precipe raportas pri la agadoj de la asocio: jarraportoj, analizoj de agadoj. Kelkaj artikoloj aŭ fragmentoj de ili aperas en la norvega.
Ankaŭ troviĝas en la revuo informoj pri Esperanto trovitaj en aliaj naciaj gazetoj aŭ radioj, impresoj de partoprenoj en Esperanto-renkontiĝoj, kaj la rubriko ”Inter ni dirite – la junulara forumo” en kiu estas ankaŭ tradukita norvega bildstrio Pondus.
Sur la malantaŭa paĝo troviĝas informoj pri novaj libroj kaj varoj aperintaj en la mendoservo de NEL.
Historio
Honoratus Bonnevie, frua redaktisto de la gazeto
La revuo aperis en 1909 dum 10 numeroj sub la nomo Norvega Esperanta Gazeto, kaj ekde 1910 la titolo estas Norvega Esperantisto. Komence de 1915 Norvega Esperantista Ligo, provizore fermis la bultenon Norvega Esperantisto, anstataŭe aliĝante al la sveda bultenoprojekto La Espero, kaj la norvego Honoratus Bonnevie, kiu jam ekde 1912 estis redaktoro de Norvega Esperantisto, iĝis ties norvega kunredaktisto.
Oni antaŭe anoncis la kunigon en Norvega Esperantisto en 1914, kelkaj respondintoj ”promesis subtenon kaj esprimis konsenton”, kaj plimulto ne respondis. Ŝajne la agema esperantoklubo en Gävle proponis la kunigon, kiu oni vidis kiel farindan pro ekonomiaj kialoj (eble rilate al la unua mondmilito), pro kunhelpi al skandinava kunlaboro, kaj pro la ”dum pacaj tempoj ripetitan plendon ke estas tro multe da gazetoj”.[1]
La nordia kunlaboro bone funkciis ĝis 1922, kiam la bulteno Norvega Esperantisto denove ekfunkciis sendepende, kaj Honoratus Bonnevie ankoraŭ ĝis inkluzive 1924, kaj poste ankoraŭfoje unu jaron dum 1932, restis ties redaktoro.
