Museo Galileo, iama Istituto e Museo di Storia della Scienza (Instituto kaj Muzeo de Scienco-Historio) estas en Florenco, Italio, en Piazza dei Giudici, laŭlonge de la rivero Arno kaj proksime al la Uffizi Galerio. La muzeo, dediĉita al la astronomo kaj sciencisto Galileo Galilei, hejmas en Palazzo Castellani, nome konstruaĵo el la 11-a jarcento kiu estis konata ankaŭ kiel Castello d’Altafronte. Museo Galileo posedas unu el la plej gravaj kolektoj de sciencaj instrumentoj en la mondo, kio sugestas la rolon kiun la Grand-Dukoj Mediĉoj kaj Lorenoj atribuis al scienco kaj al sciencistoj. La Museo di Storia della Scienza remalfermiĝis al la publiko kun la nova nomo Museo Galileo la 10an de junio, 2010, post dujara fermo por redezajno kaj plinovigaj laboroj. Ĝi estis inaŭgurita kvar cent jarojn post la publikigo en marto 1610 fare de Galileo de lia verko Sidereus Nuncius (Stelmesaĝisto).
