„ En la bibliografioj de Esperantaj originalaĵoj registriĝis nur du titoloj de F.V. Dorno, flandra verkisto, kiu aktivis inter la du mondmilitoj. Post 40 jaroj Hungara Esperanto-Asocio dankinde represis ambaŭ titolojn en unu volumo. Ili ja ne apartenas al la senmortaj verkoj de nia literaturo, sed ĝuste ilia simpleco plaĉos al vasta publiko serĉanta en la legado ne pli ol agrablan, distran tempopasigon... Por la detektiva komedio Levu la Manojn! fonas granda urbo dum internacia Esperanto-kongreso. Ĉi-teme la satiraj aludoj estas intencaj. Tiujn amuzajn tri aktojn facile ludus ĉiu trupo disponanta du soziojn... Lingvo facila. Stilo agrabla. Unu riproĉo : la uzo de interjekcioj neesperantigitaj : ah! oh! ”
„ En la lasta tempo ni ne ricevis multe da teatraĵetoj taŭgaj por grupludado, kaj la malnovaj rapide elĉerpiĝas. Plezure do ni bonvenigas ĉi tiun komedion, kiu verŝajne povus trafi bonan sukceson. Oni ĝin verkis por prezento ĉe kongreso de Flandraj Esperantistoj en Antverpeno en 1939, kaj tie ĝi ricevis bonan akcepton. La roluloj ne estas tro multaj (4 viroj, el kiuj du devas intersimili; 3 virinoj). La agado estas vigla, kaj en la tri aktoj troviĝas scenoj ridigaj kaj facile ludeblaj. ”
