EuroBillTracker estas plurlingva tuteŭropa retkomunumo, kiu celas spuri la vojaĝon de eŭro-monbiletoj tra la tuta mondo. La partoprenantoj kontribuas tajpante la serian kodon de siaj monbiletoj, kaj la retejo aŭtomate montras, ĉu aliaj uzantoj jam enmetis tiujn samajn biletojn pasintece. En la ĵargono de la retejo, tiaj retrovoj nomiĝas "trafoj".
En la jaro 2010, trafoj okazis averaĝe je ĉiu 140-a bileto. La ekzakta kvanto tamen ege dependas de la lando: en Finnlando kaj Slovenio, kie la projekto plej furoras, okazis trafoj je ĉiu 40-a bileto, dum en Irlando, ekzemplocele, okazas trafoj je ĉiu 1000-a bileto.
EuroBillTracker neniel estas ligita kun la Eŭropa Unio, la Eŭropa Centra Banko, la naciaj centraj bankoj aŭ aliaj financaj institucioj. La uzado de EBT estas tute senpaga.
Historio
La eŭro enkondukiĝis en la unuaj 12 membroŝtatoj de eŭrolando la 1-an de januaro2002, kaj la retejo ekaperis en la reto ĝuste tiam.
La projekton iniciatis franco, Philippe Girolami (giro). Ekde mez-2003 la retejo baziĝas sur dediĉita servilo funkciigata de finno, Anssi Johansson (avij). La retejo daŭre estas plibonigata de avij, ekde 2005 kun aldona helpo de germano, Marko Schilde (nerzhul). La retejestrojn kunhelpas teamoj de aktivaj EBT-uzantoj, kiuj bontenas la forumon, tradukas la retejon, provizas retpoŝtan subtenon, kaj efektivigas diversajn aliajn taskojn.
La esperantlingva versio de la paĝaro EuroBillTracker aperis en 2003.
