El Jadida (portugale Mazagão) estis portugala posedaĵo en Maroko, en Nordafriko, en la nuna urbo El-Jadida (arabe, الجديدة), je 90 kilometroj sudokcidente de Kazablanko.
Fondita en 1513 kiel komercejo, ĝi rezistis la atakojn de la maŭroj danke al la penado kaj investo de la Portugala krono, por servi al la navigistoj kiuj faris la Itineron de Kabo. La rekonstruado de la fortikaĵo estis tasko de la plej bonaj arkitektoj italaj kaj hispanaj. La portugalaj fortikaĵoj de la urbo estis inkluditaj en la listo de Monda heredaĵo de Unesko en 2004. En tiu aro elstaras la Preĝejo de la Ĉieliro. La fortikaĵo montras la kunfluon de la eŭropa kaj maroka kulturoj kaj pro la arkitekturo kaj pro la teknologio.
