Ap Lei Chau (ĉine鴨脷洲) aŭ Aberdeen Island (angle, insulo Aberdeen) estas insulo en Honkongo, sudokcidente de la Honkonga Insulo, ĉe la haveno Aberdeen kaj la kanalo Aberdeen. Ĝi havas areon de 1,32 km² kaj estas parto de la suda distrikto de Honkongo.
En 1968 la registaro komencis konstruadon de centralo sur la insulo, kiu liveras elektron al la tuta hongkonga insulo. En 1980 estis konstruita ponto por ligi Ap Lei Chau al la honkonga insulo, kio rezultigis rapidan ekonomian evoluon de la insulo.
Geografio
La monto Yuk Kwai Shan sur Ap Lei Chau
Ap Lei Chau, kies nomo signifas "insulo de la anasalango" (Ap signifas anason, Lei langon kaj Chau insulon) estis nomita laŭ sia formo, kiu similas al lango de anaso.
En la norda parto de la insulo troviĝas la plej multaj loĝantoj, la sudo estas malpli multe priloĝita.
La plej alta monto sur la insulo estas la Yuk Kwai Shan aŭ monto Johnston.
Ap Lei Chau donis sian nomon al geologia formacio, kiu kovras la plimulton de la honkonga insulo.[1]
Pro siaj 61.900 loĝantoj/km² Ap Lei Chau estas la tutmonde plej dense loĝita insulo.
