Расонскі бой
Асноўны канфлікт: Вялікая Айчынная вайна
Расонскі бой
Дата	19 верасня 1942
Месца	Расоны
Вынік	перамога партызан
Праціўнікі
Расонская партызанская брыгада імя І. В. Сталіна Нямецкія акупацыйныя войскі і іх саюзнікі

Расонскі бой — бой Расонскай партызанскай брыгады імя І. В. Сталіна і войска гітлераўскай Германіі ў вёсцы Расоны 19 верасня 1942 года.

У сярэдзіне 1942 года партызаны перарэзалі ўсе камунікацыі, якія вялі ў Расоны, і пачалі блакаду гарнізона праціўніка, які налічваў болей за 300 гітлераўцаў. Да сярэдзіны верасня ўдарамі па апорных пунктах праціўніка ў вёсках Клясціцы, Сакалішча, Сівошына і іншых, партызаны адрэзалі ад іх Расонскі гарнізон. Значную дапамогу аказалі партызанам падпольшчыкі Расонскага партыйна-камсамольскага падполля, якія сабралі і перадалі партызанскаму камандаванню звесткі пра колькасць і ўзбраенне праціўніка.

Артылерыйскім абстрэлам умацаванняў Расонскага гарнізона ў ноч на 19 верасня партызаны вымусілі пакінуць Расоны. Было знішчана каля 20 акупантаў, захоплена 2 мінамёты, 2 кулямёты, каля 75 вінтовак. З гэтага часу ў Расонах, Расонскім і суседніх з ім раёнах была адноўлена Савецкая ўлада, створана Расонска-Асвейская партызанская зона.

У 1981 годзе ў Расонах у гонар партызан, якія ў 1942 годзе вызвалялі гарадскі пасёлак ад нямецка-фашысцкіх захопнікаў, пастаўлены помнік.

• М. Ф. Шумейка. Расонскі бой // Беларусь у Вялікай Айчыннай вайне, 1941—1945: Энцыкл. / Рэдкал.: І. П. Шамякін (гал. рэд.) і інш. — Мн.: БелСЭ, 1990. — С. 530-531. — 680 с. — 20 000 экз. — ISBN 5-85700-012-2.