У канцы кастрычніка 2023 года ў Рэспубліцы Дагестан і ў Карачаева-Чаркесіі пачаліся пратэсты, выкліканыя нецярпімасцю да яўрэяў. Хваляванні адбыліся на фоне чарговай эскалацыі ізраільска-палесцінскага канфлікту. Падставай для выступленняў паслужыў фэйк аб прыездзе бежанцаў з Ізраіля^[2].

Жыхары Хасавюрта сабраліся каля гасцініцы «Фламінга» з-за чутак, што ў ёй нібыта прысутнічаюць грамадзяне Ізраіля^[3]. Нагодай паслужыла відэа, дзе ўбачылі яўрэя, які ішоў каля гасцініцы ў кіпе^[4]. Натоўп пачаў кідаць у будынак камяні і крычаць «Алаху Акбар»^[3]. Паліцыя дазволіла пратэстоўцам праверыць гасцініцу, каб пераканацца, што яна «вольная ад яўрэяў»^[3]. Пасля гэтага адміністрацыяй гатэля было вывешана паведамленне, што яўрэяў у будынку няма і ім уваход у яе забаронены^[2].

У г. Чаркеск прайшоў антысеміцкі мітынг з удзелам каля 500 чалавек^[5] і патрабаваннем «выселіць этнічных яўрэяў». З натоўпу гучалі заклікі да пагромаў^[6].

У аэрапорт Махачкалы ў сувязі з прылётам самалёта з Тэль-Авіва прыбылі каля тысячы пагромшчыкаў^[7], якія захапілі паветраную гавань і выйшлі на ўзлётную паласу^[8]. На месцы падзей неаднаразова была стральба^[9][10]. Пратэстоўцы правяралі машыны ў пошуках яўрэяў, а над аэрапортам паднялі палесцінскі сцяг^[11]. Дзясяткі людзей атрымалі раненні, уключаючы супрацоўнікаў паліцыі^[12]. Аэрапорт быў разгромлены і абкрадзены пагромшчыкамі^[9]. Да паветранай гавані прыйшлося сцягваць ваенную тэхніку^[9].

У г. Нальчык пагромшчыкі падпалілі Яўрэйскі рэлігійны нацыянальна-культурны абшчынны цэнтр, які знаходзіўся ў стадыі будаўніцтва, а на сцяне напісалі: «смерць яхудам» («яхуд» на арабскай азначае «яўрэй»^[13]).

У Махачкале прайшла акцыя ў падтрымку Палесціны, якую разагналі^[1]. У Чаркеску перад будынкам урада Карачаева-Чаркесіі прайшоў антысеміцкі мітынг. У ім прынялі ўдзел некалькі соцень чалавек^[14]

Інфармацыю пра антысеміцкія акцыі доўгі час ігнараваў шэраг дзяржаўных расійскіх СМІ^[15].

Пасля захопу аэрапорта Махачкалы ўладам РФ давялося стварыць аператыўны штаб і прызначыць яго кіраўніком Сяргея Мелікава^[9]. Гэта стала першым выпадкам пасля Чачэнскай вайны, калі ўрад цалкам страціў кантроль над аэрапортам у буйным горадзе краіны^[7]. Упраўленне СК па Дагестану ўзбудзіла крымінальную справу па артыкуле аб арганізацыі масавых беспарадкаў (частка 1 артыкула 212 КК)^[16].

Афіцыйны Тэль-Авіў заклікаў Маскву абараніць расійскіх яўрэяў^[17].