Зубная эмаль — знешняя ахоўная абалонка каронкавай часткі зубоў чалавека.

Эмаль з’яўляецца самай цвёрдай тканкай у арганізме чалавека, што тлумачыцца высокім утрыманнем неарганічных рэчываў — да 97 %. Вады ў зубной эмалі менш, чым у астатніх органах, 2-3 %. Цвёрдасць дасягае 397,6 кг/мм² (250—800 па Вікерсу). Таўшчыня пласта эмалі адрозніваецца на розных участках каронкавай часткі зуба і можа дасягаць 2,0 мм, а ля шыйкі зуба амаль адсутнічае.