Барыс Усеваладавіч, Барыс Усеваладкавіч (пасля 1116 — пасля 1151) — князь гарадзенскі.

Сын князя Усевалада Гарадзенскага і Агаф’і (дачкі Уладзіміра Манамаха). Гарадзенскае княства атрымаў у спадчыну ад бацькі. У 1144 г. удзельнічаў у паходзе кіеўскага князя Усевалада Ольгавіча супраць галіцкага князя Уладзіміра Валадаравіча. Падтрымаў князя Ізяслава Мсціславіча ў яго барацьбе з Юрыем Далгарукім за кіеўскі велікакняжацкі сталец. У 1150 г. разам з Ізяславам хадзіў пад Дарагабуж, у 1151 г. войска Барыса Усеваладавіча ўдзельнічала ў аблозе Кіева, пасля ўзяцця якога гнала князя Юрыя да Белгарада. Памёр пасля 1151 г., за ім гарадзенскі сталец пераняў брат Глеб Усеваладавіч.

• Назаренко А. В. Городенское княжество и городенские князья в XII в. // Древнейшие государства Восточной Европы, 1998 г.: Памяти чл.-корр. РАН А. П. Новосельцева. М., 2000. ISBN 5-02-018133-1. — С. 172—178.