Si Joko Widodo (namundag Hunyo 21, 1961) sarong Indones na pulitiko, gobernador kan Jakarta asin iyo an matukaw na bagong elihidong presidente kan Indonesya sa Oktobre 20 salida ki Susilo Bambang Yudhoyono, resulta kan pangggana sa eleksyon nasyunal na ginibo kan Hulyo 9, ngonyan na taon 2014. Siya nagtukaw man alkalde kan Surakarta alagad napili siya kan saiyang partido, an Partido Demokratiko Indones- Nakikipagtusay (PDI-P) na magdalagan bilang kandidato para gobernador kan 2012 na an saiyang bise iyo si Basuki Tjahaja Purnama asin ta siya nakaluwas sa siring na katongdan kan Septyembre 20 kun saen saiyang nadaog si Fauzi Bowo. Kan siya guminana sa pagkapresidente nakua niya an 53.15% kan boto nasyunal kumpara sa 46.85% kan boto na nakua kan saiyang kalaban na si Prabowo Subianto.[2]
Pamilya
Si Widodo, na namundag sa sarong gilid nin salog na erokan kan mga tios sa Surakarta (nginaranan man Solo), sa Probinsya nin Central Java, iyo an pinakamatuang aki ninda Noto Mihardjo asin Sujiatmi Notomihardjo asin may dating darang pangaran na Mulyono. Siya may tolong tugang na babae, na iyo sinda Iit Sriyantini, Ida Yati asin Titik Relawati.[3]
An agom niya iyo si Iriana na taga-Solo (naagom kan Desyembre 24, 1986) asin igwang tolong aki sinda na sinda Gibran Rakabuming (1988), Kahiyang Ayu (1991), asin Kaesang Pangarep (1995).[4]
Edukasyon asin pag'entra sa pulitika
Siya nag'adal kan saiyang primarya sa State Primary School 111, Tirtoyoso, na eskwelahan sa bako man mayayaman. Nagtatrabaho mantang nag'aadal, siya nagtatabang pa sa pabrika nin mwebles kan saiyang ama. Pinadagos niya pag'adal sa SMP Negeri 1 Surakarta kan saiyang sekundarya pero ta naglagpak sa entrance exam nakadagos siya pag'adal sa SMA Negeri 6 Surakarta. Dangan nag'entra siya sa Forestry Faculty of Gadjah Mada University kun saen nagin hararom an adal niya sa mga gamit kan kahoy asin an teknolohiya kaini. Nagtapos siya sa kurso sa pagsurat kan thesis niyang "Study on Plywood Consumption in Final Consumption in Surakarta municipality".[5]
Nagdakula siyang tataong magpanday asin ngapit nagkaag nin sadiring negosyo nag'eeksportar nin mga muebles. Alagad, kan 2005 naglaog siya sa pulitika asin duwang beses nakatukaw bilang alkalde kan saiyang banwaan na Surakarta. Kan 2012, nanggana siya sa katongdan na gobernador kan Jakarta.
Pagkatawo
Si Widodo iyo an enot na makapot kan pinakahalangkaw na katongdan bilang presidente kan Indonesya na dai mahale sa pamilyang mayaman asin elitista, o sa pamilyang palbag na sa pulitika o may pusog na karera sa lantad nin militar arog kan mga naenot na mga lider kan nasabing nasyon.
Praktikal asin simple sa pamumuhay, siya mahilig sa musikang rock asin may lipotok na pakikitrato sa mga ordinaryong tawo sa komunidad. An sarong bentahe niya pa, ta siya sana an lider pulitika na makapot nin dakulang pwesto na may tunay na eksperensya sa pagpadalagan nin gobyerno sibil.[6]
Mga panluwas na takod
- [4] A Child of the Slum Rises as President. Kinua 24-07-14
- [5] Ten Things to Know about Joko Widodo. Kinua 24-07-14
- [6] Indonesia Elects Metalhead President Joko Widodo. Kinua 24-07-14
- [7]With the Election of Joko widodo, Indonesia Writes a New Chapter. Kinua 24-07-14
Toltolan
