Hernois (aumtlich: Hernals) is da 17. Hieb vo Wean. Dea Gmeindebeziak is 1892 aus de söbständign Gmeinden Hernois, Dornboch und Neiwoidegg büdt wuan. Ea liegt aussahoib vom Giatl, dea wos an da Stö vom ehemolign Linawoi aug'legt is.
Da Nauman kummt vo de „Herrn an da Ois“, de ehemolign Besitza (1135 urkundlich erwähnt) vo dem Gebiet, auf dem de Siedlungen Hernois und Dornboch entstaundn san.
Eadkunde
Da Beziak Hernois liegt im Nordwestn vo Wean am Ausleifa vo de Oipn zum Weana Beckn. Hernois is 11,35 km² groß und is da zehntgreßte Weana Gmeindebeziak. Des san 2,7 % vom Weana Stodgebiet. Da Hieb geht entlaung da kanäulisiatn Ois zwischn Weana Woid und Giatl. Da hechste Berg vo Hernois is da Heiberg mit 464 m.
Beziakstäu
De ehemois söbständign Vuaoate vo Wean - Hernois, Dornboch und Neiwoidegg - san 1892 eingmeindet wuan. Draus is da 17. Hiab entstaundn. Hernois liegt im dicht bebautn Ostn, Neiwoidegg is da bewoidete Nordwesttäu und Dornboch liegt im Siidwestn vom Beziak.
Woppn
S'Hernoisa Woppn is dreitäut. Dabei steht jeda Täu fia an vo de ehemois söbstständign Gmeinden Hernois, Dornboch und Neiwoidegg.
Da obare Täu steht fia Hernois. De blaun Weintraum auf rodn Grund zaagn drauf hi, dass Hernois amoi a Weinbauandorf woa.
Da linke untare Täu is Dornboch gwidmet. De zwa sübanan kreiztn Schlissl symbolisian des Stift Sankt Beda in Soizburg, de amoi de Grundherrn vo Dornboch und Hernois woan.
De rechte untare Seitn steht fia Neiwoidegg. Des Heiserl mit de zwa Bam auf da greanan Wiesn symbolisiat den ehemolign Herrnsitz.
Kuitua und Sehnswiadigkeitn
Kalvarienbergkirchn
Lacy-Grobmoi im Schwoaznbergpark
Sengswiadigkeitn
De wichtigstn kiachlichn Sähnswiadigkeitn in Hernois san de Kalvarienbergkirchn, de Sühnekirchn und de Marienpfoa. Dazua kummt des Jörgerbod, da Spuatclub-Plotz in Dornbach und da Oiszaubabrunnen mit Statuen vom Schramml-Quartett.
In Dornbach kaun ma de Dornbacha Pfoakirchn und de Annenkapön nennan, in Neiwoidegg des Schloss Neiwoideggg und n Schwoaznbergpark.
Theata
In Hernois gibts zua Zeit nua zwa wichtige und bekaunte Theata. Im Wiener Metropol kumman Musicals, Konzerte und Kabarees zua Auffiahrung und de Kulisse Wien is dagegn a reins Kabareetheata.
Spuat
Da Weana Spuat-Club - Foabm schwoaz/weiß - is ana vo de ötastn Spuatvareine vo Östareich und zua bestn Zeit nua unta „da Spuatclub“ bekaunt gwesn. Dea Varein is ausn Weana Cyclistenclub hervuagaunga, dea am 24. Feba 1883 gründt wuan is. De Fuaßboiobteulung gibts seit 1907 und is damit a ana vo de ötastn Fuaßboivareine vo Östareich. De Fuaßbolla san dreimoi östareichischa Masta, siem moi Vizemasta und amoi Kapsiega wuan. Duach zwa Pleitn is da Weana Spuat-Club in de 90er Joa diaf obgstiazt, besteht owa no imma. De Fuaßboiobteulung ist 2002 obgspoitn woan und spüt ois eignständiga Fuaßboivarein in da drittklassign Regionäuliga Ost.
Partnabeziak
Partnabeziak vom Beziak Hernois is da 17. Beziak von Tokyo, Fuchū. De Ziakiaschn im Lidlpark san a Gschenk vom Partnabeziak.
Hernoisa Berühmtheitn
Josef "Nockal" Bratfisch, Leibfiaka vom Kronprinz Rudolf
_-_Kalvarienbergkirche.JPG)
