Florida is a Bundestoot im Siidostn vo de Vaoanigte Stootn vo Amerika, am Atlantik bzw. Goif vo Mexiko. De Haptstod is Tallahassee, de gresste Stod is Jacksonville.
Mid 18,8 Milliona Eihwohna is's da viat bevejkarungsreichste Bundesstoot vo de USA.[2][3]
Florida kimmt ausm Spanischn und hoaßt sovui wia Lond voi vo Bleamen ("Flowery Land"). Da Noma stommt vom easchtn Eiropäa, am spanischn Entdecka Juan Ponce de León, dea wo des Land anno 1513 zum easchtn Moi betretn hod, zua Ostazeid, wo ois bliaht hod.
Eadkunde
Geografische Log
Florida is a Hoibinsl. Am Ostgstod liegt da Atlantische Ozean, am West- und da Sidgstod da Goif vo Mexiko.
Da Bundesstoot bsitzt am sidlichn End a Inslkettn, de Keys gnennt wean. De bekonntestn sand de Florida Keys, de wo duach 42 Bruckn mitananda vabundn han. Am End vo dera Inslkettn liegt Key West. Vo duat aus hans nua 140 Kilometa auf Kuba. In Key West is aa da sidlichste Punkt vo da kontinentain USA.
Mit ana Fläch vo 137.374 km² hot Florida an 22. Rang unta de Bundesstootn. 30.486 km² (17,9 Prozent) vom Stootsgebiet han Wossaflächn.
Ausdehnung vom Stootsgebiet
Florida hod a Broatn vo 260 km zwischn 79°48'W bis 87°38'W und a Läng vo 800 km zwischn 24°30'N bis 31'N.
Nochboastootn
Im Noadn lieng de US-Bundesstootn Georgia und Alabama. Es liegt in da Nech vo Kuba, Haiti und ondane Lända vo da Karibik. Na Hawaii is es da sidlichste Stoot vo de USA.
Gschicht
Es gibt archäologische Funde in Florida, de wo zoang, doss de Region scho mearare Joatausend bewohnt gwen is. Vo de Eiropäa, vom Spania Juan Ponce de León, is Florida 1513 entdeckt worn. 1521 is da Ponce de León wieda, desmoi mid Siedla im Ohong, af Florida kema und hot de spanische Kolonie La Florida grindt. De oahoamischn Indiana hom de Kolonie oba zaschlong.
