Yoga
Exerciciu físicu, práctica espiritual (es) y terapia psicocorporal (es)

El yoga^[1] (sánscritu devanāgarī योग ; xunión) ye una de les seis dársanes asiátiques o escueles de filosofía ortodoxa india. Entiéndese como un estáu de xunión ente l'alma individual (Ātman) y l'alma universal (Brāhmaṇ), que s'algama por disciplines físiques, mentales y espirituales.

El yoga considerase un arte, una ciencia y una filosofía integral y práutica, que pretende sublimar el nivel de conciencia del ser humanu pa llegar a un estáu de dicha plena, conocíu como samādhi.

Desendólcase nel marcu del hinduismu, budismu y yainismu.

El significáu mayormente aceutáu pa la pallabra yoga ye xunión. Yoga bien del raigañu sánscritu yuj, anque tamién significa suxetar, xuntar, xuncir, dirixir y concentrar l'atención pa la so aplicación y usu.

El verbu yuj tien el mesmu orixe indoeuropéu que la pallabra asturiana xugu (el preséu).

Les escueles filosófiques o sistema de pensamientu indiu, conócense como darśanes (que significa reflexones, puntos de vista, visiones), entamaron a desendolcase a partir del sieglu V EDC (enantes dómina común). Divídense en dos grupos āstika (ortodoxa) y nāstika (heterodoxa), atendiendo a la so aceutación o non de los cuatro Vedes y el so teísmu o ateísmu, respeutivamente.

Vendríen a clasificase del siguiente mou:

Āstika:

1.Mīmāṃsā de Jaimini

2.Vedānta de Shankara y Ramanuja

3.Sāṃkhya de Kapila

4.Yoga de Patañjali

5.Nyāya de Gotama

6.Vaiśeṣika de Kanada

Nāstika:

1.Budismu de Siddhārtha Gautama

2.Yainismu de Vardhamana Mahavirá

3.Cārvakā de Cārvāka Muni

4.Ājīvika de Gośāla

Ye abegoso precisar cuando s'orixinó'l yoga, los primeros asomos atópense nunes figures antropomórfiques de terracota y unos baxo relieves en postures yoguiques descubiertos nos yacimientos arqueolóxicos de les ciudaes de Mohenjo-Daro y Harappa (anguaño Paquistán), na denominada civilización del valle del Indo, que s'estendió por lo que güei ye'l noreste de Paquistán y Afganistán y noroeste d'India. Xunto col antiguu Exiptu y Mesopotamia, la civilización del valle del Indo conformen les tres grandes civilizaciones del mundiu antiguu. Entre 2600 e.C. y 1900 e.C. tuvo'l máximu rellumu esta cultura del Indo qu'arrodia una superficie de 1.250.000 Km² na que se diseñaben ciudaes con zones residenciales y alministratives, grandes aveníes, o canalización d'agües residuales.

Los drádives, los antiguos pobladores del valle del Indo, yá conocíen el yoga enantes de l'apaición de los invasiones arios. Cerca'l 1500 e.C., los arios, pueblu protoindoeuropéu, venció a una civilización que yá taba en decadencia, imponen una organización social basada en castres y sustituyen la tradición animista lligada a la tierra y les fuercies de la naturaleza de los drádives por unos dioses celestiales y gurreros.

Entre el 1500 e.C. y el 1000 e.C. compónse'l primeru de los vedes, el Rigveda, que contién más de 1000 himnos y nellos faise referencia al yoga, qu'anque nun se fala de la práutica sí se traten principios como vayu, chacres y nadis.

Periodu arcaicu o protoyoga, entre el 3000 e.C. y 1800 e.C.

Periodu preclásicu o vedánticu, entre 1500 e.C. y 500 e.C.

Periodu épicu o puránicu, entre 500 e.C. y 200 e.C.

Periodu clásicu, alredor del 200 e.C.

Periodu post-clásicu, del 200 d.C. a 1900.

Periodu modernu, dende el 1900 a anguaño.

El yoga ye un, pero escontra él empobínense diferentes caminos, con diferentes matices que permiten que les diversos tipos de personalidaes afáyense meyor. Estos caminos nun tienen porque tar aisllaos, sinón que van entetexéndose, trescurriendo paralelos hasta entemecese.

Nel Bhagavadgītā (rellatu épicu hinduista, alredor del sieglu III e.C.) descríbense les cuatro siendes principales :

Del raigañu bhaj: compartir, pertenecer, adorar.

El Bhaktiyoga tratase d'una esperiencia espiritual d'amor puro y devoción. Les persones con una tendencia emocional tresformaran eses emociones nun amor incondicional a lo divino, nel que l'ego, la individualidá, dílese no absoluto.

Lo más común ye que se trate d'una práutica nel ámbitu de lo relixoso, nel que se faen rituales, recítense mantres, cantos, pelegrinaciones pa espresar esi amor a Dios. Sin embargu, l'amor y la devoción nun necesita d'un dios, un bhakta (prauticante bhaktiyoga) pue volquiar la so devoción sobre la Divinidá, el guru (maestru), la naturaleza, l'Absulutu, etc.

Ramakrishna, Paramahansa Yogananda considérense exemplos de bhaktiyoga.

Jñāna: conocimientu

El prauticante de jñānayoga na busqueda del conocimientu usa l'análisis y les capacidaes de la mente racional hasta onde esta llega. Nun segundu procesu autointerrógase y indaga p'algamar el conocimientu de la realidá en forma d'esperiencia direuta.

Viveka (discernimientu) entre lo eterno/finito, real/irreal, la personalidá humana y el yo suprapersonal.

Swami Vivekananda, Ramana Maharishi considerense esponentes de jñānayoga.

Karma: actividá.

El karmayoga ye especialmente apropiáu pa persones con muncha vitalidá y espresividá. Les aiciones de la vida cotidiana conviértense na vía pa elevar l'estáu de conciencia. Ye una forma de meditación dinámica nel que l'aición queda desprendía del frutu, nun s'espera un beneficiu individal. Esti cultivu del desapegu fai que los conflictos del egu queden resueltos y, asina, cada intre conviértese nuna ayalga.

Mahatma Gandhi ye consideráu como karma yogui (prauticante de karmayoga).

Rāja: real.

Rājayoga, yoga real, tamién ye conocíu como aṣṭāngayoga (yoga de los ocho miembros) o yoga clásicu. Patañjali (filósofu indiu que vivió alredor del sieglu III EDC) define'l yoga como'l cese de les fluctuaciones de la mente.

Cola introspeición y l'estudiu'l prauticante de rājayoga tresciende'l mundiu físicu p'adientrase nes fondures de la mente hasta atalantar la naturaleza esencial del ser.

Nos Yoga Sūtres Patañjali fai una recopilación y sistematización d'enseñances arcaiques en ciento noventa y seis aforísmos estructuraos n'ocho pasos que l'aspirante tien que perfeucionar p'algamar la lliberación.

Los ocho miembros o pasos siguen esta estructura :

I. Yama. Preceutos sociales.
1. Ahiṃsā. Non violencia, tantu de pallabra, como aición y pensamientu.
2. Satya. Veracidá.
3. Asteya. Nun robar, honestidá.
4. Brahmacarya. Control de los deseos.
5. Aparigrahā. Non apegu.
II. Niyama. Preceutos personales.
1. Śauca. Pureza interna y esterna.
2. Saṅtoṣa. Aceutación, contentu, satisfaición.
3. Tapas. Austeridá, autodisciplina.
4. Svādhyāya. Autoestudiu.
5. Īśvarapraṇidhāna. Devoción, abandonu a la vuluntá divina
III. Āsana. Postura.
IV. Prāṇāyāma. Control de prāṅa o fuercia vital cola respiración.
V. Pratyāhāra. Control sensorial.
VI. Dhāraṇā. Concentración.
VII. Dhyāna. Meditación.
VIII. Samādhi. Lliberación.

T. Krishnamacharya y Swami Vishnudevananda, fueron conocios prauticante de Rājayoga.

El haṭhayoga ye'l yoga más conociu n'occidente, anque, xeneralmente, tiense una idea confusa de lo que ye esti tipu de yoga, quedando básicamente reducía a āsana (postures físiques).

Haṭhayoga significa lliteralmente yoga forzáu, yoga del esfuerciu. Ta mui estendía la creyencia que les sílabes ha y ṭha que componen la pallabra haṭha, quieren dicir lluna (que representa simbólicamente la enerxía mental) y sol (representa la enerxía vital), respeutivamente. Anque la etimoloxía nun ye rigurosa, la intención del haṭhayoga sí ye apropiada. Cuando les fuercies contrapuestes s'armonicen, con una serie de pasos, qu'entamen pola purificación del cuerpu físicu hasta aportar a niveles más sutiles, despiértase la enerxía espiritual conocida como kuṇḍalini.

Dalgunos autores consideren l'haṭhayoga como una variante o estensión del rājayoga yá que comparten delles carauteristiques. Otros autores considérenlos opuestos afirmando haṭhayoga tien el so orixe nos āgames tántricos y el rājayoga nos Upaniṣad. Sin embargu, el maestru B.K.S. Iyengar nel so llibru Light on Yoga considera que rājayoga y haṭhayoga compleméntense formando un únicu averamientu hacia la lliberación.

Por sādhanā entiéndese la busqueda, la práutica cotidiana onde l'aspirante desendolca les enseñances de la so disciplina purificándose y perfeicionándose.

Nel entornu del aṣṭāngayoga y especialmente del haṭhayoga execútense una serie d'āsanses que flexibilicen y fortalecen el cuerpu físicu. Asina un cuerpu sanu ye un meyor sustentu de les siguientes fases más sutiles. Les siguientes pasos, dependiendo de qu'escuela se trate puen centrase n'exercicios respiratorios, recitación de mantres, exercicios de concentración, meditación, etc.

Bhagavadgītā (alredor sieglu III e.C.), forma parte del testu épicu Mahābhārata. Nel Bhagavadgītā, establecese un dialogu entre Kṛṣṇa ( avatar de Viṣṇu) y Arjuna momentos enantes d'entrar en guerra, esplicandose'l yoga y el vedānta.

Yoga Sūtra de Patañjali (alredor sieglu III e.C.). Conocese tamién como aṣṭāngayoga, yoga de los ocho miembros : yama, niyama, āsana, prāṇāyāma, pratyāhāra, dhāraṇā, dhyāna y samādhi.

Gorakṣaśataka (sieglu X-XI) de Gorakṣa. Denomínase tamién sadaṅgayoga, el yoga de los seis pasos: āsana, prāṇāyāma, pratyāhāra, dhāraṇā, dhyāna y samādhi.

Haṭhapradīpikā, conocíu tamién como Haṭhayogapradīpikā (alredor sieglu XV) de Svāmi Svātmārāma. Tamién llamáu caturaṅgayoga, el yoga de los cuatro pasos : āsana, prāṇāyāma, mudrā y samādhi.

Gheraṇḍasaṁhitā (alredor sieglu XVII). Tamién denomináu como saptaṅgayoga, el yoga de los siete pasos : purificación, fortalecimientu, estabilidá compostura, lliviandá, realización y aisllamientu.

Sivasaṁhitā (alredor sieglu XVII), d'autor desconocíu. Espónense tecniques purificadores.

El términu yogī , na actualidá refiérese simplemente a quien prautica yoga, pero dende'l puntu vista hindú fai referencia al asceta, sādhu (renunciante errante por tradición), saṃnyāsin (renunciante por llinaxe, xeneralmente errante) o guru (maestru) dedicáu a la vida espiritual.

Na actualidá tien creaose el neoloxismu yogīnī pa referise a la prauticante de yoga femenina.

Patañjali (alredor sieglu III e.C.), recoyó la tradición del yoga y sintetizola nos aforismos del Yoga Sūtra, base de la sienda del rājayoga.

Shankaracharya(722-820), yogui na tradición del jñānayoga, que va afitar la doctrina Advaita Vedanta, qu'establez el non dualismu.

Matsyendranath (alredor siegu IX-X), consideráu autor de Kaulajñānanirṇaya, uno de los primeros testos del haṭhayoga. Fundador de la escuela Natha Pantha.

Gorakshanath (alredor sieglu XI-XII): discípulu de Matsyendranātha. Consideráu'l fundador de la escuela del haṭhayoga.

Svātmārāma (sieglu XV), autor del Haṭha Yoga Pradīpikā.

Mirabai (1498-1547), poeta hindú na tradición del bhaktiyoga.

Ramakrishna (1836-1886), na tradición del bhaktiyoga, devotu de la diosa Kali y maestru de Advaita Vedanta, va contribuyir al renacimientu del yoga na India. Va algamar la illuminación siguiendo los preceutos nel marcu de la relixón hindú, musulmana y cristiana.

Swami Vivekananda (1863-1902), discípulu de Ramakrishna. La so participación en Chicago en 1893 nel Partamentu de les Relixones del Mundiu, foi una de los primeros pasos del yoga n'occidente.

Aurobindo (1872-1950), poeta, filósofu y maestru de yoga integral.

• Mirra Alfassa (1878-1973), conocida como la Madre, collaboradora y continuadora de les enseñaces d'Aurobindo.

Ramana Maharshi (1879- 1950), maestru védicu vedānta que vivió de forma ascética na conlina d'Arunachala.

Swami Sivananda (1887-1963), fundador The Divine Life Society. Escribió más de trescientos llibros de yoga, relixón, espiritualismu, hinduismu, moral, hixene y salú. El so lema yera: Sirve. Ama. Regala. Medita. Purifica. Realiza.

• Swami Satchidananda (1914-2002), foi discípulu de Ramana Maharshi, sin embargu, atopó en Swami Sivanada al so guru. Autor de varios llibros de yoga.

• Swami Vishnu Devananda (1927-1993), en 1957 Swami Sivanada encamento-y que fuere a occidente a enseñar yoga. Desendolcó un de los primeros cursos de formación de profesores de yoga n'occidente.

Sri Tirumalai Krishnamacharya (1888-1989), consideráu'l padre del yoga modernu. Enseñó yoga nel palaciu del mahārāja ( gran rei) de Mysore. Va ser el guru del notables maestros:

• Indra Devi (1899-2002), noble rusa. La so amistá col mahārāja de Mysore permitio-y ser alumna de T. Krishnamacharya. Foi una celebridá en Hollywood onde eseñó yoga a les estrelles de cine.

• K. Pattabhi Jois (1915-2009), enseñó en Mysore la so dinámica visión del aṣṭāngayoga.

• B. K. S. Iyengar (1918-2014), tres deprender col so guru en Mysore, asentose en Pune onde fundó un métodu basáu na precisión de la execución de les postures.

• T. K. V. Desikachar (1938-…), coles enseñances de so padre, T. Krishnamacharya, desendolcó un yoga suave adautáu a ca individuu.

Paramahansa Yogananda (1893-1952), enseñó kriyāyoga, una forma de yoga devocional activu. Autor d'Autobiography of a Yogi(1946).

A. C. Bhaktivedanta Swami Prabhupada (1896-1977), fundador de ISKOM (Sociedá Internacional pa la Conciencia de Krishna), conocios como los Hare Krishna.

Gopi Krishna (1903-1984), autor en 1967 de la so autobiografía Kundalini: The Evolutionary Energy in Man, onde esplica les sos esperiencies espirituales.

Maharishi Mahesh Yogi (1917-2008), creador de la Meditación Trescendental, entamó a ser conocíu n'occidente cuando The Beatles foron a visitar el so ashram.

Yogui Bhajan (1929-2004) d'orixe sijk, foi determinante na intruducción del kundalini yoga n'occidente.

Osho (1931-1990), foi un controvertíu maestru espiritual qu'estableció les conocíes como Meditaciones Actives.

Mata Amritanandamayi (1953-…), conocida como Amma o la santa de los abrazos.

• Ashtanga yoga, tamién conocíu como ashtanga vinyasa yoga, de K. Pattabhi Jois, ye un tipu dinámicu de yoga nel que'l pauticante enllaza les postures, ordenaes por secuencies progresives mediante un sistema de vinyasa (movimientu), respiración sonora y dristis (colocacion de la mirada).

• Iyengar yoga de B.K.S. Iyengar, ye na práutica mui téunica, nel que se busca la perfeuta execución de la postura.

• Kundalini yoga popularizose nel sieglu XX por Yogui Bhajan, pretende facer ascender la enerxía Kuṇḍalini llatente na base de la columna por les canales enerxéticos, nadis, a traviés de los chacres. Pa tal propositu usense mantres, kriyes, āsanes, pranayames, meditación (dhyāna) nos chakres.

• Satyananda yoga de Swami Satyananda Saraswati. Ye una escuela holística que pretende integrar los aspeutos físicos, psicolóxicos y espirituales en cada práutica.

• Sivananda yoga de Swami Sivananda y el so discípulu Swami Vishnu Devananda. Inspírase en cinco principios: exerciciu apropiao (āsana), respiración apropiao (prāṇāyāma), relaxación (śavāsana), dieta apropiao (vexetariana) y pensamientu positivu y meditación (vedanta y dhyāna ).

• Vini yoga de T. K. V. Desikachar. Les téunique de yoga nun se consideren un métodu inalterable sinón que s'adauten a les necesidaes de cada individuu.

• Bhikram yoga de Bikram Choudhury. Anque'l so creador ye indiu, la popularización y desendolcu d'esti yoga prodúxose nos Estaos Xuníos. Durante 90 minutos execútense 26 postures y dos exercicios respiratorios nuna sala a unos 40°C.

• Dharma yoga de Dharma Mittra. Esti brasilanu afincáu na ciudá de Nueva York dende 1958, amuesa un estilu de yoga dinámicu.

• Jivamukti de David Life y Sharon Gannon. Inspiraos nes escueles de Sivananda y Ashtanga yoga de K. Pattabhi Jois , afiten les sos enseñances en cinco aspeutos: shastra (escritures), bhakti (devoción), ahimsa (non violencia), nāda (música) y dhyāna (meditación).

• Power yoga, Vinyasa yoga y Flow yoga son estilos de yoga desendolcaos nos Estaos Xuníos inspiraos nel ashtanga yoga de K. Pattabhi Jois, pero con secuencies más creatives.

L'om o āuṃ, representao pol simbolu ॐ, conozse tamién como oṃkāra, auṃkāra o praṇava (la meyor plegaria). Ye común tanto nel hinduismu, budismu y xainismu.

L'om sánscritu ta emparentáu cola pallabra llatina omne, nos dos casos significa too. Les pallabres asturianes omnipresencia, omnipotencia y omnisciencia tan rellacionaes.

El mantra om representa la vibración primoxenia del universu.

La sílaba om ta cargada d'un gran simbolismu. Les lletres ĀUṂ representen les tres guṇes (cualidaes de que ta compuestu l'universu) : sattva (bondá contemplativa), rajas (pasión activa) y tamas (inorancia inerte). Y el símbolu enteru representa la guṇātīta (ser más allá de les guṇes).

Tamién representa los tres estaos d'esistencia manifestada: creación, mantenimientu y destrucción.

El mantra om aveza recitase al aniciar y terminar la práutica.

• Alicia Souto. Los origenes del Hatha yoga.

• Chaudhuri, Haridas. Yoga Integral.

• Danilo Hernández. Claves del yoga.

• Granés, Marta. La divinitat del Ioga.

• Iyengar, B.K.S.. Luz sobre el yoga, Luz sobre los yoga sutras de Patañjali.

• K. Pattabhi Jois. Yoga Mala.

• Schleberger, Eckard. Los dioses de la India.

• Sharath Jois, K. Astanga Yoga Anusthana.

• Vazquez Díez, José Manuel. Manual de yoga integral para occidentales.

• Vishnu Devananda, Swami. El libro del yoga, Meditación y mantras.

• Vivekananda, Swami. Bhakti yoga, Karma yoga, Raya yoga, Gñana yoga.

• Wikimedia Commons tien conteníu multimedia tocante a Yoga.