Les sos mayores ciudaes, según el censu de 2004 son: Nuneaton (77.500 hab.), Rugby (62.700 hab.), la estación balnearia de Leamington (45.300 hab.) y Bedworth (32.500 hab.).
La mayoría de la población vive nel norte y el centru del condáu. El norte siempres foi tradicionalmente industrial, con ciudaes tales como Nuneaton, Bedworth y Rugby que les sos industries inclúin (o incluyíen) la minería, la producción de cementu y testiles y la construcción.
Nel centru y oeste de Warwickshire atópense les prósperes ciudaes de Royal Leamington Spa, Warwick, Kenilworth y Stratford-upon-Avon. El sur del condáu ye principalmente rural, ta escasamente pobláu y nun hai ciudaes de dimensiones relevantes.
El marxe meridional de Warwickshire inclúi una pequeña zona de los Cotswolds y el picu más altu ye Ebrington Hill, de 261 m.
Históricamente, bona parte de Warwickshire occidental, inclusive la zona que forma agora parte de Birmingham y les West Midlands, tuvo cubiertu pol antiguu monte d'Arden (anque la mayor parte foi baltáu p'apurrir combustible pa la industrialización nos sieglos XVII a XIX). Por esta razón, distintos llugares de la parte noroccidental del condáu lleven nomes cola terminación "-in-Arden".
Historia
Castiellu de Kenilworth.
Warwickshire foi una división del reinu de Mercia a principios de sieglu XI. La primer referencia del condáu apaez nel añu 1011 col nome de Waeinewiscscr.
Mientres la Edá Media, Warwickshire tuvo apoderáu por Coventry que, nesi tiempu, yera una de les ciudaes más importantes d'Inglaterra por cuenta de les sos transaiciones testiles.
