Vicente Alberto Álvarez Areces (4 d'agostu de 1943, Xixón – 17 de xineru de 2019, Xixón) foi un políticu asturianu, alcalde de Xixón de 1987 a 1999 y presidente del Principáu d'Asturies de 1999 a 2011.
En 1962 ingresó nel PCE, onde tuvo hasta marzu de 1978. Como miembru del Comité Central del PCE, al que pertenez dende 1969 hasta 1977, organiza y preside la I Conferencia Rexonal del PCE d'Asturies. Horacio Fernández Inguanzo relévalu na secretaría política na II Conferencia Rexonal poles discrepancies dientru de la direición y con CC.OO.. Tres les primeres eleiciones xenerales d'esi añu adopta una postura crítica cola direición, que dirá agravándose col tiempu, hasta que dexa'l partíu tres la III Conferencia Rexonal (Perlora, marzu de 1978), xunto a otros 112 delegaos.
En 1987 concurre como candidatu del PSOE a les eleiciones municipales de Xixón, siendo nomáu alcalde, cargu nel que repite n'otros dos mandatos. En 1999 obtien la mayoría absoluta pola circunscripción central nes eleiciones autonómiques, polo que sal como presidente del Principáu'l 20 de xunetu. En 2003 repite na presidencia, pero esta vez gracies al sofitu d'IU ya que nun algamó la mayoría absoluta. Nes eleiciones el PSOE consiguió 20 escaños, 21 el PP y 4 IX-BA-LV, anque la abstención de IX na invistidura permitió a Areces algamar la presidencia. Repitió nel cargu depués de les eleiciones del añu 2007, gobernando inicialmente en minoría, pero algamando'l sofitu d'IX un añu y mediu más sero. Finalmente anunciaría la so renuncia a presidir nuevamente'l Principáu d'Asturies, siendo sustituyíu al frente del Gobiernu por Francisco Álvarez Cascos.
Ver tamién
Referencies
Enllaces esternos