Unidá Nacionalista Asturiana (UNA) ye anguaño una federación de partíos formada por Andecha Nacionaliega, IAS, Andecha por Carreño, Asturianistes ya independientes.
Tres les eleiciones de 1989, abriríase una vía ente les executives d'UNA y Partíu Asturianista (PAS) que remata nuna coalición de cara a les eleiciones asturianes de 1991, que fizo que, en marzu de 1990, nueve miembros de la so Xunta Nacional, miembros d'una corriente crítica d'opinión y críticos cola coalición col PAS, fueren espulsaos de la organización polos otros 14 miembros d'esi muérganu. Estes persones, depués, fundaríen Andecha Astur y Izquierda Asturiana.
Unidá Nacionalista Asturiana (UNA) presentárase yá a les eleiciones europees de 1989 con José Suárez "Felechosa" de candidatu, anque non ensin divisiones internes sobre lo acertao d'esta participación. Tamién nesi añu, n'ochobre, UNA preséntase a les eleiciones estatales, lo que supunxo un desgaste económicu al acudir a dos cites eleutorales nun añu. Nesta convocatoria, UNA, algama 3.164 votos (un 0,54% del total) y el Partíu Asturianista (PAS), algamare 3.476 votos (un 0’57 %).
La coalición UNIDÁ yera'l resultáu d'ún de los preseos que taba guetando un ampliu sector del nacionalismu asturianu. Dende la creación d'Andecha Astur (AA) y un añu depués Izquierda Asturiana (IAS), dambes formaciones polítiques taben lluchando por un mesmu espaciu politicu.
El fechu de dir de la mano nes eleiciones autonómiques y de conceyos de 2007 nun fuera cenciello. Como en tolos partíos hebo un sector pautista y otru conservador, a lo cabero la demanda social y política qu'esixía una parte de la sociedá asturiano, que quería un partiu nacionalista d'izquierdes y ecoloxista fuerte decantó la balanza pal llau pautista.
Pela so parte Andecha Nacionaliega, punxo'l so enfotu en conservar el so nome orixinal: Andecha Astur, ganando en toles ocasiones los xuicios que se socedieron.
En pasando la dómina eleutoral UNIDÁ siguió calteniendo la so actividá tanto nos conceyos como a nivel asturianu, celebrando'l tradicional Día de la nación asturiana, el 8 de setiembre como venia siendo vezu nel nacionalismu asturianu con una espicha, pero por primer vegada como coalición, a pesares de que yá nun taben los verdes nin andecha. Al empar taba trabayándose nuna nueva refundación pa convertir a la coalición nuna federación de partíos.
Entrevista a Lali García (candidata al Congresu), Chusa Varela (candidata al Senaú) y Yolanda González (Miembru Coordinadora d'UNIDÁ) en Radio Sele.
Los resultaos nes eleiciones xenerales de 2008 foron de 848 votos [0,12 %] tando perlloñe del diputáu y consideráronse un fracasu, yá que el partíu que la forma, IAS, algamara nes eleiciones de 2004 831 votos.
El procesu nel que taba inxertu la coalición p'algamar una federación de partíos, finó, a la fin, el 21 de xunu de 2008, cuando se recuperó'l nome d'Unidá Nacionalista Asturiana.
