La economía basada nel trabayu manual trocóse por otra dominada pola industria y la manufactura. La Revolución entamó cola mecanización de les industries testiles y el desenvolvimientu de los procesos del fierro. La espansión del comerciu tuvo favorecida pola meyora de les rutes de tresportes y darréu pola nacencia del ferrocarril. Les innovaciones teunolóxiques más importantes foron la máquina de vapor y la denomada Spinning Jenny, una potente máquina rellacionada cola industria testil. Estes nueves máquines favorecieron enormes medríes na capacidá de producción. La producción y desenvolvimientu de nuevos modelos de maquinaria nes dos primeres décades del sieglu XIX facilitó la manufactura n'otres industries y espoxigó tamién la so producción.
Asina ye que na Revolución industrial auméntase la cantidá de productos y amenorga'l tiempu nel qu'estos se faen, dando pasu a la producción en serie, yá que se simplifiquen xeres complexes, en delles operaciones cencielles que pue facer cualquier obreru ensin necesidá de que seya mano d'obra cualificada, y d'esta miente baxar costos en producción y alzar la cantidá d'unidaes producíes sol mesmu costu fixu.
