El llamáu reinu indogriego, apoderáu por una minoría d'orixe griegu y acesmáu por poderosos enemigos, nun llegó a caltener una unidá monolítica sinón que se vio estazáu delles vegaes anque unificáu pola so singularidá cultural. Asina, ente'l 180 e. C. y cerca del 10 d. C. foi gobernáu por una socesión de más de trenta rey helenísticos, de cutiu en conflictu l'unu col otru. Llegó a destacar un reinu indogriego" cuando'l rei grecobactriano Demetrio invadió India en 180 e. C. A ésti siguiéron-y les importantes conquistes en territorios gangéticos llevaes a cabu escontra'l 150 e. C. por Menandro I quien llegó a ocupar la importante ciudá de Pataliputra y asina n'última instancia creando una entidá que depués se dixebró del poderosu Reinu grecobactriano que taba centráu en Bactria; pasando asina la ciudá de Taxila en territoriu qu'anguaño correspuende al modernu estáu de Paquistán ―nel norte del Panyab, próxima a Caxmir― a cumplir les funciones d'una capital cosmopolita del nuevu reinu de Menandro o reinu indogriego.
Mientres los dos sieglos del so dominiu, los reis griegos d'India combinaron les llingües griegues ya indies y símbolos, como puede reparase nes sos monedes, y entemecieron la cultura griega antigua, cola ―tamién antigua― hinduista, especialmente les sos creencies relixoses (fuerte influxu del budismu) tal como lo atestigüen los restos arqueolóxicos de les sos ciudaes y nos cercos nes cualos esprésense indicaciones del so sofitu al budismu. Los reis indogriegos paecen algamar un nivel de sincretismu cultural ensin otru equivalente na hestoria[ensin referencies], que les sos consecuencies inda son perceptibles; en particular l'espardimientu y la influyencia d'arte grecobudista.
Los griegos de la cuenca del Indo y la cuenca alta del Ganges n'última instancia sumieron como una entidá política alredor del 10 d. C. dempués de les invasiones al territoriu meridional de la cuenca de mentáu ríu llevaes a cabu polos partos y, especialmente polos tocarios que fundaron nel so llugar l'Imperiu Kushana, anque los bolsones de poblaciones griegues probablemente permanecieren por dellos sieglos más, talo como se supón entá, foi'l casu de la etnies anguaño llamaes kalash y nuristaní.
