Tanto'l nome común como'l llatín refiérense a la forma d'esta especie de cogorda. El vocablu llatín pleurotus (pie movíu) refierse a la crecedera del estípite (pie) con respeutu al sombreru o pileu, ente que la pallabra llatina ostreatus (ostra) refierse a la forma del sombreru en sí, que s'asemeya al bivalvu del mesmu nome. En chinu estes cogordes denómense píng gū (平菇; lliteralmente "Fungu planu").
Carauterístiques
La oreyona (P. ostreatus) presenta un sombreru de 5 a 20 cm de diámetru, col pie movíu escontra un llau y creciendo davezu xunto a otros exemplares superpuestos. La superficie ye llisa y brillosa; de color buxu o gris escuru, y n'ocasiones buxu pardu o azuláu. El marxe del sombreru camuda cola edá, tando endolcáu nos exemplares nuevos y abiertu nos adultos. Tien les llámines apertaes, delgaes, decurrentes y de color ablancazáu. La carne ye firme, daqué dura nos exemplares adultos, y de sabor y golor prestosu. Crez naturalmente na superficie de toconos y tueros de maderes blandes como'l chopu, la faya o la salguera, ente otros. Abondo común.
Observaciones
Ye habitual el so tracamundiu con otros Pleurotus, como Pleurotus pulmonarius más pequeñu y de color ablancazáu. Pola so calidá de bon comestible ye llargamente cultiváu pa la so comercialización.
Nutrición y gastronomía
La cogorda d'oreyona, como otres cogordes, representa una fonte importante de seleniu. El seleniu ye bien importante pal metabolismu humanu, y demostró ser unu de los micronutrientes que tienen un mayor efeutu antioxidante y de proteición escontra dellos tipos de cáncer. El so altu conteníu en polisacáridos trai una aición beneficiosa sobre'l sistema inmunolóxicu.
Comparte col restu de cogordes comestibles el fechu de contener un tipu de glúcidos que les enzimes humanes nun pueden dixerir, pero que pueden ser lleldaos parcialmente poles bacteries del colon de mou que se porten nel aparatu dixestivu humanu de manera asemeyada a la fibra alimentaria. La fibra y estos glúcidos énchense col agua y regulen el tránsitu intestinal. Les cogordes tamién aumenten la escreción d'acedos biliares y tienen propiedaes antioxidantes y hipocolesterolemiantes.
Avisu: La comestibilidá de cogordes ha determinase por micólogos espertos o autoridaes sanitaries competentes. La información errónea o incompleta pue causar daños por envelenamientu o intoxicación mortal. Nun consumas cogordes ensin garantíes.
