Anacletu o Cletu o Anencletu ye, pa los católicos, el tercer obispu de Roma que gobernó la Ilesia de Roma. Pa los ortodoxos, el tercer presbíteru (presidente) de la Ilesia de Roma. Asocede posiblemente a Llinu nel 76 y muerre quiciabes nel 88.
El nome d'esti papa ta suxetu a dulda: nun se sabe si se llamaba Cletus, Anacletus o Anencletus. Conozse de la esistencia d'un personax nomáu Anacletus, acurtiáu normalmente en Cletus, que morriere martirizáu na persecución de Domicianu ensin dulda ente los años 88 y 96.
Eusebiu de Cesarea, Irenéu de Lyon y Agustín d'Hipona afirmen qu'Anacletu y Cletu foren la mesma persona. Sicasí, el Catálogu liberianu (354) y el Liber pontificalis distinguen dos persones diferentes.
El Liber pontificalis atribui-y la ordenación de venticinco sacerdotes.
Nomáu abusivamente martir pol Liber pontificalis, ta consideráu como santu pola Ilesia Católica como pola Ilesia Ortodoxa. La so festividá ye'l 26 d'abril.
Nel sieglu IX, el pseudo-Isidoru, autor de les Falses epístoles decretales, atribui-y trés epístoles.
- ↑ Afirmao en: Catholic-Hierarchy.org. Identificador Catholic Hierarchy de persona: cletus. Data de consulta: 18 ochobre 2020. Llingua de la obra o nome: inglés.
