La nebulosa Omega alcuéntrase a una distancia ente 5000 y 6000 años lluz, y tien un tamañu d'unos 15 años lluz de diámetru, tando acomuñada a una nube molecular d'unos 40 años lluz de diámetru y una masa de 30000 mases solares. La masa total de la nebulosa Omega calcúlase nunes 800 mases solares y ye una de les rexones HII más brilloses y masives de nuesa galaxa; si nun apaez más impresionante ye por vese práuticamente "de cantu".
Esiste un cúmulu (NGC 6618) na nebulosa, que contién nel so centru dos estrelles de tipu espectral O4V, y amás dos estrelles de tipu O5V, y 100 estrelles de tipu espectral más tempranu que'l B9. Ye la radiación d'eses estrelles nuevu y caliente —sobremanera la de los dos O4V— la qu'escita y fai rellumar los gases de la nebulosa; estudios recién amuesen qu'ésti ye ún de los cúmulos más nuevos conocíos, con una edá que nun llega nin al millón d'años y que la nebulosa de xuru alluga ente 8000 y 10000 estrelles que nacieron nella, 1/3 d'elles nel cúmulu NGC 6618.
