María Jesús Álvarez González (21 de marzu de 1962, Peñaullán) ye una política asturiana perteneciente al FSA. Foi Presidenta de la Xunta Xeneral del Principáu dende'l 7 de xunetu de 1999 hasta'l 15 de xunu de 2011. Ye conseyera de Agroganadería y Recursos Autóctonos del Principáu d'Asturies dende'l 28 de mayu de 2012. En xunetu de 2015, camúdase la denominación de la conseyería que pasa a llamase Conseyería de Desenvolvimientu Rural y Recursos Naturales
Biografía
Ye llicenciada y xeografía y hestoria pola Universidá d'Uviéu. Empezó la so andadura política en 1989, afiliándose al PSOE na so llocalidá natal, Pravia. Nes eleiciones municipales de 1991, formó parte de la candidatura d'esi partíu nel conceyu de Pravia, resultando escoyida conceyal y asumiendo la delegación de cultura, servicios sociales y sanidá mientres esa llexislatura.
En 1995, formó parte de dos candidatures del PSOE: la del conceyu de Pravia, nes eleiciones municipales; y la de la Xunta Xeneral del Principáu, pola circunscripción occidental, nes eleiciones autonómiques. En dambos casos resultó escoyida, conceyal y diputada autonómica respeutivamente, magar, en dambos casos, el PSOE taba na oposición. Nesta llexislatura, foi vocera d'infraestructures del grupu parllamentariu socialista y presidenta de la comisión de pidimientos.
En 1999 repitióse la situación de 1995, y nuevamente foi escoyida conceyal y diputada, magar esta vegada, gracies a la mayoría absoluta de la que gociaba'l PSOE, foi propuesta pol so grupu parllamentariu na Xunta Xeneral del Principáu Xunta pa presidir la cámara, resultando escoyida y dimitiendo como conceyal nel conceyu de Pravia.
Revalidó'l so escañu nes eleiciones de 2003 y 2007, y de nuevu foi escoyida Presidenta de la Xunta Xeneral del Principáu.
Tres les eleiciones autonómiques de 2011, magar llogró de nuevu un escañu, foi sustituyida na presidencia de la Xunta Xeneral pol Diputáu del Partíu Popular Fernando Goñi.[1]
L'escasu sofitu parllamentariu col que cuntaba'l gobiernu constituyíu tres les eleiciones de 2011, llevaron a la so Presidente, Francisco Álvarez Cascos a convocar nuevos comicios en marzu de 2012.[2] Nesta ocasión, María Jesús Álvarez encabeza per primer vegada la llista socialista pola circunscripción occidental y de nuevu llogra un escañu. Gracies a la victoria del so partíu, ye nomada conseyera de Agroganadería y Recursos Autóctonos del Principáu d'Asturies, siendo Presidente del Gobiernu Javier Fernández.[3]
Referencies
.
