PROFILPELAJAR.COM

Luis del Olmo
Vida
Nacimientu	Ponferrada, 31 de xineru de 1937 (87 años)
Nacionalidá	España
Estudios
Llingües falaes	castellanu
Oficiu	periodista
Premios	ver Medaya d'Honor de Barcelona ; Cruz de Sant Jordi (1998) ; Gran Cruz de la Orde Civil d'Alfonsu X el Sabiu (2016) ;

Luis del Olmo Marote (31 de xineru de 1937, Ponferrada) ye un periodista y llocutor de radio, consideráu como una de les grandes "instituciones" periodístiques d'España^{[ensin referencies]}. A lo llargo de 30 años dirixó y presentó'l programa radiofónicu Protagonistas, el que más años tuvo enceso na historia de la radio española, con más de 12.000 ediciones y qu'entamó'l 1 de xunetu de 1973.

Trayeutoria

Tien una bien llonga trayeutoria profesional, aniciada nos sos años d'adolescencia, cuando entamó la so primer xera nel mundu de les ondes, al traviés de Radio Juventud, na so población de ñacencia. En 1962 en Madrí, incorporóse por oposición a la cadena radiofónica Radio Nacional de España, y seyes años dempués asitió en Barcelona. En RNE fíxose cargu, en magar el 1 de xunetu de 1973, del programa Protagonistas nosotros, de 4 hores de duración, más sero conocío como De costa a costa. Dende marzu de 1982 presentó al tiempu'l programa Hora Punta na mesma cadena, anque en xineru de 1983 debió dexar De costa a costa pola aplicación de la Llei d'Incompatibilidaes. Pocos días más sero despidióse tamién de RNE al ser contratao pola Cadena COPE, y dende'l 1 de febreru escomenzó a emitir Protagonistas vosotros pa la emisora de la Conferencia Espiscopal Española, al traviés de Radio Miramar.

En 1991 camudó d'emisora, al xunise a la diba poco aniciada daquella Onda Cero, onde asitió hasta 2004. D'ehína pasó, siempre col so espaciu Protagonistas, a Punto Radio, hasta la desapaición d'ésta en 2013, cuando tornó, en mayu, a la emisora pública Radio Nacional de España.

Rescampla tamién la so xera como empresariu radiofónicu. En 1983 foi ún de los impulsores de Ràdio Salut, xunta José María Ballvé, Jorge Arandes y Francisco Palasí, anque pocos años dempués dexó'l proyeutu. En 1991 anició Onda Rambla en Barcelona, cola que llegó a crear una cadena con 13 emisores repartíes per tola xeografía catalana.

El 13 d'avientu de 2013 dexó'l so oficiu de llocutor radiofónicu, xubilándose tres más de mediu sieglu énte los micrófonos, dando anuncia d'ello nel propiu programa de RNE.

Premios Protagonistas y Micrófonos d'Oru

Dende 1997 apúrrense añalmente en Barcelona los Premios Protagonistas, organizaos por Onda Rambla y nos que Luis del Olmo fai d'anfitrión, que premien a los protagonistes que más rescamplen en cada ámbitu. L'actu remata con una comida na que'l platu cimeru ye'l botiellu d'El Bierzu.

Tamién organiza los Premios Micrófonos d'Oru, que se celebren cada añu en Ponferrada, dientro de la Selmana Nacional de la Radio, y que apurre la Federación de Asociaciones de Radio y Televisión.

Premios y distinciones

Premiu Ondas de 1971, na categoría Locales de radio.
En 2002 la so entrevista a Antoni Gaudí valió una mención especial del xuráu de los Premios Ondas.
El 26 de xineru de 2007 foi investío Doctor Honoris Causa pola Universidá Rei Xuan Carlos de Madrid.
En 2012 recibió, na 59ª edición de los gallardones qu'apurre Radio Barcelona de la Cadena SER, el Premiu Ondas Especial del xuráu.
El 27 de xineru de 2014 recibió en Boiro (Coruña) el primer homenaxe tres la so retirada, de la mano del Club Exxpopress de Periodistas de Galicia, que-y apurrió'l títulu de Socio de Honor y la Insignia de Plata de la entidá. Esi día tamién plantó y apadrinó un árbole col so ñome (un olmo, como'l so apellíu) nel Parque de la Comunicación (en Boiro), l'únicu parque d'España aniciáu por periodistes.

Referencies

↑ Afirmao en: catálogu de la Biblioteca Nacional Checa. Identificador NKCR AUT: xx0199197. Data de consulta: 1r marzu 2022.
↑ Afirmao en: Gran Enciclopèdia Catalana. Identificador de la Gran Enciclopedia Catalana: 0020640. Editorial: Grup Enciclopèdia. Llingua de la obra o nome: catalán.
↑ Identificador del Boletín Oficial del Estado: BOE-A-2016-9267.