| Esti artículu o seición necesita referencies qu'apaezan nuna publicación acreitada, como revistes especializaes, monografíes, prensa diaria o páxines d'Internet fiables.
Pues añadiles tu mesmu o avisar al autor principal del artículu na so páxina d'alderique pegando: {{subst:Avisu referencies|Harry Potter (personaxe)}} ~~~~ |
"[...]
Harry siempre fora flacu y pequeñu pal so tiempu. Tovía paecía más flacu y pequeñu de lo que daveres yera, porque tolo que tenía pa vistir yera la ropa vieyo de Dudley, y esti yera como cuatro vegaes más grande qu'él. Harry tenía una cara escarnada, rodiyes güesudes, pelo prieto y güeyos verdes claros. Llevaba gafes redondes xuníes con bien de cinta d'apegar de toles vegaes que Dudley-y solmenara na nariz. La única cosa qu'a Harry-y prestaba de la so traza yera un repuelgu bien finu que tenía na frente, cola forma d'un rellampíu."
Harry James Potter ye'l protagonista de la serie Harry Potter de J. K. Rowling. Lo más de la trama de los llibros cubre siete años na vida del güérfanu Potter que, nel so decimoprimer cumpleaños, entérase de que ye un magu. Asina, asiste al Colexu Hogwarts de Maxa y Bruxería pa prauticar la maxa so la guía del atentu direutor Albus Dumbledore y d'otros profesores. Harry tamién afaya que yá ye famosu a lo llargo la comunidá máxica de la novela, y que'l so destín ta atáu al de Lord Voldemort, el magu tenebrosu mundialmente tarrecíu y asesín de los sos padres.
Conceutu y creación
Acordies con Rowling, la idea tanto pa los llibros de Harry Potter como pal so personaxe epónimu vieno mentes esperaba un tren atrasáu dende Manchester hasta Londres en 1990. Ella dixo que la so idea pa "esti neñu flacu, con pelo negru y gafines que nun sabía que tenía poderes máxicos, foi faciéndose cada vez más real énte min". Mentes desenvolvía les idees pal so llibru, ella tamién decidió faer a Harry un güérfanu qu'asistía a un internáu llamáu Hogwarts. Ella desplicó nuna entrevista en 1999 con The Guardian: "Harry HABÍA ser un güérfanu — pa ser un axente llibre, ensin mieu de falla-y a los sos padres, deceicionalos... y Hogwarts HA ser un internáu —¡la metá de les coses importantes asoceden de nueche! Depués ta la seguridá. Tener un fíu propiu refuercia la mio creyencia de que los neños sobre manera quieren seguridá, y eso ye lo que Hogwarts-y ufierta a Harry."
La muerte de so madre'l 30 d'avientu de 1990 inspiró a Rowling a escribir a Harry Potter como un neñu naguando polos sos padres muertos, los sos sentimientos faciéndose "muncho más fondos, muncho más reales" qu'en borradores anteriores, por cuenta de qu'ella mesma rellacionábase con él. Nuna entrevista en 2000 con The Guardian, Rowling tamién estableció que'l personaxe de Wart na novela de T. H. White Camelot ye "l'ancestru espiritual de Harry." Finalmente, estableció la data de nacencia de Harry como'l 31 de xunetu, la mesma que la d'ella. Sicasí, ella caltuvo que Harry nun taba direutamente basáu en nenguna persona real: "Él namái salió d'una parte de min".
Rowling tamién caltuvo que Harry ye un modelu afayadizu a siguir na vida real pa neños. "La ventaya d'un héroe o heroína ficticiu ye que puen conocelu meyor de lo que puen conocer a un héroe real, dalgún d'ellos nunca conoceríen [...] si a la xente-y presta Harry y s'identifica con él, toi complacida, porque piensa qu'él ye bien prestosu."
Referencies
Enllaces esternos
