Elizabeth Helen Blackburn (26 de payares de 1948, Hobart) ye una bioquímica australiana, descubridora de la telomerasa, una enzima que forma los telómeros demientres la duplicación del ADN.
Biografía
Naz en Hobart, capital de la isla de Tasmania (Australia), fía d'un matrimoniu de médicos. Estudió Bioquímica na Universidá de Melbourne y doctoróse en Bioloxía Molecular en 1975 pola Universidá de Cambridge. Ellí conoció a John Sedat, tamién biólogu molecular, col que se casaría.
Entama a estudiar los telómeros na Universidá de Yale en 1975, pasando a la Universidá de California en Berkeley. En 1984, descubre xunto a Carol Greider la enzima telomerasa, y un añu depués, aísllenla. Ye entós cuando entamen a crear telómeros artificiales col fin d'estudiar la división celular y asina poder controlala. En 1986 ye nomada direutora de llaboratoriu, convirtiéndolu en líder mundial na manipulación de l'actividá de la telomerosa nes célules. En 1993 ye nomada direutora del departamentu de Microbioloxía y Inmunoloxía.
En 2001, Elizabeth Blackburn ingresó na Comisión de Bioética de los Estaos Xuníos, pero retiróse en 2004 en desacuerdu coles torgues que l'administración de George W. Bush imponía na investigación celular.
Investigación científica
Elizabeth Blackburn foi de los primeros bioquímicos n'estudiar los telómeros, xunto a John Gall y Jack Szostak. Los telómeros son los estremos de los cromosomas de les célules eucariotes, necesarias tanto pa la división celular como pa mantener la integridá y la estabilidá de los cromosomas. La enzima telomerasa, forma los telómeros demientres la duplicación del ADN, ye la que pauta la vida de les célules: cuanto menor seya la segregación de telomerasa, más cortos serán los telómeros, hasta llegar a un momentu nel que la dixebra celular seya imposible y les célules terminen morriendo. Polo tanto, los telómeros tán rellacionaos col avieyamientu celular.
Blackburn y Greider tamién descubrieron que les célules canceroses, pol contrariu, son quien a siguir produciendo mayor cantidá de telomerasa, provocando la aparición de tumores. Esti descubrimientu puede contribuir a atopar sustancies, métodos o dianes eficaces pa frenar la segregación d'esta enzima y asina ayudar nel tratamientu del cáncer.
Premios
Elizabeth Blackburn recibió numberosos premios de sonadía:
- Premiu Eli Lilly de Microbioloxía (1988)
- Premiu de l'Academia Nacional de Ciencies d'Estaos Xuníos en Bioloxía Molecular (1990)
- La Medaya d'oru de la Sociedá Americana contra'l Cáncer (2000)
- Premiu Dr. AH Heineken de Medicina (2004)
- Premiu L'Oreal-UNESCO Award for Women in Science (2008)
- Premiu Paul-Ehrlich-und-Ludwig-Darmstaedter (2009) xunto con Carol Greider
- Premiu Nobel en Fisioloxía o Medicina (2009), xunto con Carol Greider y Jack Szostak
Xunto a Carol Greidner, John Gall o Jack Szostak, recibió en 2006 el Premiu Albert Lasker por Investigación Médica Básica o'l premiu Louisa Gross Horwitz (2007)
En 2007, la revista Time Magazine's incluyóla dientro de la lista de les 100 personalidaes más influyentes del mundu.
Pertenez a les sociedaes científiques de mayor sonadía del mundo como la Sociedá Americana de Bioloxía Celular, al Institutu de Medicina d'EEXX o a la Royal Society de Londres.
Según destacó l'Institutu Karolinska d'Estocolmu, al comonicar la concesión del premiu destacó la so contribución y la de los otros dos científicos a colos que lu compartió, por descubrir cómo los cromosomas tán protegíos polos telómeros y la enzima telomerasa.
Referencies
Enllaces esternos
Bibliografía
- CHUAIRE; Lillian (2006): Telómeros y telomerasa: breve recuento de una historia iniciada por Hermann Müller y Barbara McClintock. EN: Colombia médica, vol 37, nº4 (oct-dic)
- LOPES DE OLIVEIRA; Diego (2008): 12 científicas del siglo XX. Elizabeth Helen Blackburn: el camino al telómero. El País - Salud, 12 de xineru.
_BAR.svg){kind=small}
